Республика шошилинч тиббий ёрдам илмий маркази Бухоро филиалида янги 2023 йил йил кириб келиши муносабати билан байрам тадбири ўтказилди.
Тадбирни РШТЁИМ Бухоро филиали директори т.ф.н Т.Я.Мусоев очиб берди. Унда филиалнинг директор ўринбосарлари, бўлим мудирлари, бўлим катта ҳамширалари иштирок этдилар. Йиғилиш қатнашчилари ва ходимларни филиал директори янги йил байрами билан табриклаб, энг самимий ва эзгу ниятлар билдирди.
Азиз ҳамкасблар!
Янги йил мўъжизавий тарзда ўтмишни, ҳозирни ва келажакни, ёрқин орзулар, янги мақсадлар ва чексиз бахт-қувончни ҳамда эртанги ёруғ кунга интилишни бир-бирига боғлайдиган айёмдир. Ушбу ёрқин байрам ҳар доим ҳаётбахш умидлар, янги ташаббуслар рамзи бўлган ва шундай бўлиб қолмоқда. У ҳар биримизга ўзгача қувонч бахш этади, қалбларимизни эзгулик сари интилиш туйғуси билан тўлдиради, қондошларимиз ва дўстларимизга, Ватанимиз ҳамда халқимизга бўлган меҳр-муҳаббатимизни янада мустаҳкамлайди.
Ушбу ҳаяжонли дақиқаларда Сизларга самимий ҳурмат-эҳтиромимизни изҳор этишдан ва Янги йил байрами билан самимий муборакбод этишдан, барчангизга мустаҳкам соғлиқ тилашдан мамнунман.
Янги йил ҳар бир оилага яхшилик ва фаровонлик, бахт ва қувонч келтирсин! Уйларимизда, муборак заминимизда тинчлик ва осойишталик ҳукм сурсин, осмонимиз мусаффо бўлсин!
Янги йил, янги бахт муборак бўлсин, азиз ҳамкасблар!
Шунингдек, тадбирда касаба уюшмаси раиси Б.Азимов, сўзга чиқиб байрам муносабати билан табрик тилакларини билдирдилар. Филиалда йил давомида ўзининг меҳнати, касбий маҳорати, фидоийлиги ва жонкуярлиги билан намуна бўлган 120 нафар ходимларга номинациялар бўйича ғолиблар эълон қилинди.
Номинация ғолиблари филиал касаба уюшмаси томонидан қимматбаҳо совға-саломлар билан тақдирландилар. Бундан ташқари филиалда фаолият кўрсатаётган барча 520 нафар кичик тиббий ходимлар янги йил совғалари билан кўнгли шод этилди.
Тадбир охирида марказ фаолияти ва янги йил шукуҳини ифода этувчи видеоролик намойиш қилинди. Тадбир барчага кўтаринки руҳ бағишлади.
