Президент томонидан имзоланган янги Қонун билан ёнғинга йўл қўйганлик учун товон ундириш механизми жорий этилди.
Бу нимани англатади?
Эндиликда ёнғин хавфсизлиги қоидаларини бузиш оқибатида инсон ҳаёти ёки соғлиғига зарар етказган шахсдан моддий ва маънавий зарарни қоплаш билан бирга, суд қарори асосида қўшимча товон ҳам ундирилиши мумкин.
Қонунда товоннинг энг юқори миқдорлари белгиланди:
жабрланувчи вафот этганда – БҲМнинг 3000 бараваригача (1 320 000 000 сўм);
I гуруҳ ногиронлиги юзага келганда – БҲМнинг 1500 бараваригача (660 000 000 сўм);
соғлиққа бошқача шикаст етказилганда – БҲМнинг 600 бараваригача (264 000 000 сўм).
Мазкур миқдорларни белгилашда ҳарбий хизматчи вафот этган ёки тан жароҳати олганда тўланадиган нафақалар миқдорлари қиёсий тарзда инобатга олинган.
Бундай механизм хорижда ҳам мавжуд. АҚШ, Буюк Британия, Хитой, Жанубий Корея каби давлатларда қўшимча товон ундириш институти ҳуқуқбузарликларнинг олдини олиш ва жабрланувчилар манфаатларини қўшимча ҳимоя қилиш воситаси сифатида қўлланилади.
Янги тартибнинг асосий мақсади:
✅Қўшимча товон тўлаш эҳтимоли тадбиркорлар, савдо объектлари эгалари ва бошқа масъул шахсларни ёнғин хавфсизлиги талабларини бажаришга жиддийроқ ёндашишга ундайди.
✅Шунингдек, ёнғинлар натижасида фуқароларга етказилган зиён моддий компенсация бериш орқали қопланади.
