Yandex Maps’da Buxoroning yangi panoramalari paydo bo‘ldi: endi shahar bo‘ylab yo‘nalishni oldindan o‘rganish mumkin

Yandex Maps ilovasida Buxoro shahri panoramalari keng ko‘lamda yangilandi. Endi foydalanuvchilar notanish hudud bilan oldindan tanishishi, kerakli binoga kirish joyini topishi va o‘zlari yaxshi biladigan ko‘chalarning bugungi qiyofasini ko‘rishi mumkin.
Tasvirga olish jarayonida panoramomobil Buxoro va unga yaqin aholi punktlarining 1 458 kilometr ko‘cha va yo‘llarini bosib o‘tdi. Natijada 55 mingdan ortiq panorama tayyorlandi.
Sayyohlar uchun panoramalar safarga chiqishdan oldin Buxoro bilan virtual tanishish imkonini beradi. Ular tarixiy obidalarni tomosha qilishi, borishga arziydigan manzillarni tanlashi va bo‘lajak sayohat yo‘nalishini oldindan virtual tarzda bosib o‘tishi mumkin.
Masalan, virtual sayrni mashhur minorasi bilan tanilgan Poi Kalon majmuasidan boshlash, keyin Chor Minorni tomosha qilish, so‘ng Labi Hovuz majmuasidagi Ko‘kaldosh madrasasiga yo‘l olish mumkin. Panoramalar orqali diqqatga sazovor joylarni nafaqat alohida, balki ular atrofidagi ko‘chalar bilan birga ko‘rish va bo‘lajak sayohat uchun qulay yo‘nalishni tanlash mumkin.
Smartfonda panoramalarni ochish uchun ilovaning asosiy ekrani yuqori o‘ng burchagidagi ikkita kvadrat tasvirlangan belgini bosish va «Panoramalar» qatlamini tanlash kerak. Shunda xaritada ko‘k chiziqlar paydo bo‘ladi. Ularning istalgan birini bosib, tanlangan joyni har tomondan ko‘rish va virtual sayrni boshlash mumkin. Yangilangan tasvirlarni ko‘rish uchun ekranning yuqori chap burchagidan 2026-yilni tanlash lozim.
Bu yil Yandex Maps ilovasida Toshkent va Samarqand panoramalari ham yangilandi, Andijon va Namangan shaharlarining panoramalari esa ilk bor qo‘shildi. Endi foydalanuvchilar ushbu shaharlar ko‘chalarining bugungi qiyofasini ko‘rishi va borishni rejalashtirayotgan joylari bilan oldindan tanishishi mumkin.