Айни пайтда мамлакатимиз бўйлаб, хусусан вилоятимизда ҳам пахта-йиғим терими жадаллик билан олиб борилмоқда. Бу жараёнда эса теримчиларни рағбатлантириш, уларни қўллаб-қувватлаш муҳим аҳамиятга эга.
Ромитан тумани ҳокими Умеджон Барноев доимий равишда пахта майдонларида бўлиб, фаол теримчилар билан суҳбат олиб бормоқда. Шу билан биргаликда терим жараёнида иштирок этаётган теримчилар учун яратилган шароитлар ва қулайликлар билан танишмоқда. Илғор теримчиларга совғалар улашмоқда. Бу эътибор эса теримчиларнинг ғайратига-ғайрат қўшмоқда.
Бу галги манзил “Қўрғон” ҳудудида жойлашган “Самех бобо” фермер хўжалиги пахта майдони бўлди. Туман раҳбари ҳудуд ва отряд раҳбари, теримчилар билан суҳбатлашиб, уларга яратилган шароитларни ўрганди. Шундан сўнг, фаол теримчилар туман ҳокими томонидан эсдалик совғалари билан тақдирланди.
– Миллий бойлигимизни йиғиб териб олишда терим бошидан иштирок этиб келмоқдаман. 2-терим бўлсада қийғос очилган пайкаллардан 130 килограммдан пахта теряпман,-дейди илғор теримчи Гулчеҳра Ўроқова. – Бу эса кунига 230 минг сўмгача даромад топишимга имкон бермоқда. Бугунги рағбат ҳам ғайратимизга ғайрат қўшди.
Фаол теримчилар М.Солиҳова, М.Рамазонова, Э.Аҳмедова, Х.Бахронова, М.Ҳамроева, Г. Ўроқова, Д.Солиҳова ва З.Саидовалар ҳам эсдалик совғаларни кўтаринки руҳ ва юқори кайфиятда қабул қилиб олиб “Келгусида ҳам, пахта йиғим терими жараёнида янада ғайрат билан иштирок этамиз”- дея, мамнуният билан айтиб ўтдилар.
Кундалик юмушларидан ортиб, далаларда деҳқонларга елкадош бўлиб кўмак беришни ўзининг бурчи деб билган тумандошларимизни кўриб, “ҳашар – элга ярашар” деган мақол бежизга айтилмаганига яна бир карра амин бўламиз.
