Бухоро шаҳрининг 6-мавзесида барпо этилаётган савдо марказида ҳар бири 75 ўринли, 2 та залдан иборат замонавий кинотеатр очилиш арафасида.
Ҳозирги кунгача кўҳна Бухоро шаҳрида 5 та залдан иборат ягона хусусий “Бухоро” кинотеатри мавжуд эди. Эндиликда бухоролик юртдошларимиз учун навбатдаги кинотеатрлар ишга тушиш арафасида. Сентябрь ойида ишга тушиши режалаштирилаётган кинотеатрдан ташқари, шаҳарнинг собиқ ёпиқ бозори ўрнида бунёд этилаётган “Мега Бухоро” савдо маркази биносида ҳам яна бир замонавий кинотеатр қурилмоқда. Мазкур кинотеатр 3 та залдан иборат бўлиб, жорий йилнинг декабрь ойида кино ихлосмандлари учун очилиши кутилмоқда.
Бундан ташқари, вилоят марказида болалар учун махсус кинотеатр қуриш ҳам режалаштирилган. 2 та залдан иборат ушбу янги бино 2021 йилнинг Наврўз байрами арафаси фойдаланишга топширилиши режалаштирилган. Кинотеатрлар халқаро стандартларга хос моддий-техник база билан жиҳозланмоқда. Шунингдек, “Республика кинопрокат маркази” ДУК Бухоро филиали директори Али Чориевнинг маълумотларига кўра, вилоятнинг Бухоро тумани Галаосиё шаҳарчасида қуриб битказилган янги кинотеатр фойдаланишга тайёр.
