Жорий йилнинг 18 ноябрь куни Ромитан тумани ҳокими, 1-сектор раҳбари Умеджон Барноев туман марказидан 265 километр узоқликда, Қизилқум кенгликлари бағрида, қўшни Хоразм вилоятига чегарадош, мамлакатимизнинг жанубий “қон томири” – Амударёга ёндош “Қизилравот” маҳалла фуқаролар йиғини аҳолиси билан сайёр қабули, ёшлар билан учрашуви ҳамда тадбиркорлар билан очиқ мулоқоти маҳалладаги 39-умумий ўрта таълим мактаби биносида бўлиб ўтди.
Очиқ мулоқот тарзида ўтказилган учрашувда сектор раҳбарлари, туман Халқ қабулхонаси мудири, Газли шаҳар ҳокими, туман ҳокими ўринбосарлари, туман Кенгаши депутатлари, тегишли ташкилот, корхона раҳбарлари, МФЙ ходимлари, маҳалла фаоллари ҳамда фуқаролар иштирок этди.
Ўтказилган очиқ мулоқотда фуқаролардан даволаниши учун бир марталик моддий ёрдам олишда кўмаклашиш, аҳоли томорқаларини суғориш учун сув билан таъминлаш, деҳқончилик учун ер ажратиш билан боғлиқ таклиф ва мурожаатлар келиб тушди.
Мурожаатларнинг аксарияти шу жойнинг ўзида ижобий ҳал этилди. Ечими муддат талаб этадиган ва қайта ўрганиш талаб этадиган мурожааатлар юзасидан масъулларга туман ҳокими томонидан тегишли кўрсатма ва топшириқлар берилди ҳамда уларни кўриб чиқилиши назоратга олинди. Очиқ мулоқот сўнгида “Қизилравот” маҳалласидаги ижтимоий ҳимояга муҳтож оиланинг 4 нафар фарзандларига қишки иссиқ кийим-бош топширилди.
Бундай учрашувларни ўтказишдан асосий мақсад бугунги кундаги долзарб муаммоларни тезкорлик билан ҳал этиш, жумладан, аҳоли хонадонларига ичимлик сув, газ, электр энергия таъминотини узлуксиз яхшилаш, ички йўлларни таъмирлаш, шунингдек, тадбиркорлик ривожлантириш учун барча шароитларни яратиб бериш, ижтимоий ҳимояга муҳтож бўлган, кам таъминланган оилаларни ва ёшларни ҳар томонлама қўллаб-қувватлашдан иборатдир.
Очиқ мулоқот тарзида ўтказилган учрашувдан сўнг туман ҳокими Умеджон Барноев бошчилигида мутасаддилар ҳамда аҳоли вакиллари шу ҳудуддаги 39-умумий ўрта таълим мактаби ҳудудида «Яшил макон» умуммиллий лойиҳаси доирасида мевали ва манзарали дарахт экиш жараёнида фаол иштирок этиб, ўз ҳиссаларини қўшишди.
Бундан ташқари аҳоли учун арзонлаштирилган нархдаги озиқ-овқат ва қишлоқ хўжалиги маҳсулотлари савдо ярмаркаси ташкил қилинди ҳамда бир пиёла чой устида дастурхон ёзилиб, ош тарқатилди.
