Жиноят ишлари бўйича Қоракўл туман суди Мажбурий ижро бюроси Қоракўл туман бўлимининг собиқ давлат ижрочисига нисбатан жиноят ишини кўриб чиқди.
Тергов ва суд материалларига кўра, у хизмат мавқеидан фойдаланиб, ижро ҳужжатлари бўйича фуқаролардан ундирилган маблағларни давлат депозит ҳисоб рақамига ўтказмасдан, ўзлаштириб келган. У маблағлар қабул қилингани ҳақида расмий далолатномалар тузган, аммо пулларни давлат ҳисоб рақамига киритмаган.
Ишда жами 76 та эпизод қайд этилган. Улар орасида 18,4 миллион сўмлик солиқ қарзи, 17 миллион ва 14 миллион сўмлик алимент тўловлари, шунингдек банк кредитлари ва бошқа тўловлар бўйича 11 миллион, 9,5 миллион, 9 миллион ҳамда бошқа турли миқдордаги маблағларни ўзлаштириш ҳолатлари аниқланган.
Жабрланувчилар орасида фуқаролар, фермер хўжаликлари, банклар, солиқ органлари ва коммунал ташкилотлар бор.
Суд ҳукми билан собиқ давлат ижрочиси айбдор деб топилиб, озодликдан маҳрум қилиш жазоси тайинланди. Шунингдек, у муайян муддат давлат органларида моддий жавобгарлик ва мансаб ваколати билан боғлиқ лавозимларда ишлаш ҳуқуқидан ҳам маҳрум этилди.
