Ёшлар ишлари агентлиги Бухоро вилоят бошқармаси томонидан ўтган йил май ойида «қувноқлар ва зукколар» танлови ташкиллаштирилган эди. Соврин учун 100 млн пул мукофотини бермай турли «баҳоналар» ўйлаб топган Бошқарманинг муносабати 27 июль куни эълон қилинган.
Муносабатда маълум қилинишича, танловнинг финал босқичи «Ёшлар фестивали дастури регламентига асосан якунланмай тўхтатилгани боис ғолиб аниқланмаган» ва натижада, берилиши керак бўлган 100 млн сўм пул мукофоти эгаларига топширилмаган. Нимага айнан финал босқичи «регламентга» мос келмай қолгани очиқланмаган. Албатта бу шубҳа-гумонлар туғилишига сабаб бўлади. Чорак ва ярим финал ўтказилиб, финалга келганда «ўхшамай қолган» регламентни ким тузган?
Балки 100 млн сўм пул мукофоти сабаб шундай қарорга келишгандир? Бошқарманинг мантиқсиз муносабатнинг навбатдаги бандида «карантин сабабли тиббиёт ходимлари тавсияси билан барча тадбирларни ўтказиш бекор қилингани» қўшимча қилинган. Яна ўша савол: нимага айнан Финал босқичига келиб ташкилотчилар бирдан тиббиёт ходимларининг тавсиясига қулоқ тутишди? Карантин сабаб финал босқичи бекор қилинган экан, нимага унда кейинчалик ўтказилмади? Ўзи 2021 йил май ойида Ўзбекистонда карантин бўлган эдими?
Нимага 100 млн сўмни беришга кўзи қиймаган Ёшлар ишлари агентлиги Бухоро вилоят бошқармаси шу пайтгача бу мавзуни ёпиқлигича қолдириб, маълумот бермай келди?
