Жорий йилнинг 11-апрель куни Президентимиз раислигида ўтказилган видеоселектор йиғилишида юртимизда ёшлар сиёсати соҳасидаги ишлар натижадорлигини ошириш, ёшлар билан ишлашнинг янгича тизимини жорий этиш борасида долзарб вазифалар кўтарилиб, бу борада раҳбарларга алоҳида ва аниқ вазифалар юклатилган эди.
Жумладан, 14 ёшдан 30 ёшгача бўлган ёшларнинг ижтимоий аҳволи, қобилияти ва қизиқишлари ўрганилиб, уларни 3 тоифага ажратиш, улар билан манзилли, аниқ мезонлар асосида ишлаш тизимини яратиш бўйича муҳим вазифалар белгиланди.
Бунда ўз устида ишлайдиган, аъло баҳоларга ўқийдиган, ўз тадбиркорлигини йўлга қўйган ёки ўз иш жойига эга бўлган иқтидорли ва ижтимоий фаол бўлган ёшлар “яхши” тоифага, турмуш тақозоси билан расмий сектордан иш топа олмаган, лекин иқтисодий фаол, келажакка ишонувчи ёшлар “ўрта” тоифага киритилиб, шунингдек, давлатнинг ғамхўрлиги ва эътиборини кутаётган ҳамда кўмакка муҳтож ёшлар “аҳволи оғир” тоифасига алоҳида ажратиб олинди.
Шу нуқтаи назардан, Вобкент туманидаги барча маҳалла фуқаролар йиғинида 14 ёшдан 30 ёшгача бўлган ёшлар билан ишлаш самарадорлигини оширишга алоҳида эътибор қаратилмоқда.
Куни кеча туман ҳокими Фарҳод Умаров “Кумушкент” маҳалласида бўлиб, шундай ёшлар вакиллари билан учрашиб, улар дуч келаётган ташвиш-муаммоларни ўрганди. Ёшларнинг муаммолари бўйича ишга жойлаштириш, контракт тўлови, моддий ёрдам кўрсатиш ва машина тузатиш учун асбоб-ускуналар сотиб оилш каби мурожаатларни имкон қадар ҳал этиш чоралари тўғрисида хонадон эгалари ва ёшларга тушунтирилиб, уларнинг таклифлари инобатга олинди. Мурожаатлар шу ернинг ўзида қаноатлантирилди.
Айни кунларда вилоят, туман ва шаҳар ҳокимлари, уларнинг барча ўринбосарлари, сектор раҳбарлари, бошқарма ва ташкилотлар масъуллари вилоятда мавжуд учинчи тоифадаги эътиборга муҳтож ёшлар устида ишлаб, уларнинг муаммолари ечимини излаш, ғамхўрлик қилиш ва доимий қўллаб-қувватлаш бўйича ишларни олиб бормоқда.
Таъкидланганидек, бугун орамизда мададга муҳтож, муқим иш ўрнига эга бўлмаган ёшлар борлиги бутун куч ва имкониятларни ишга солиш кераклигини, изланишни тақозо этмоқда.
