Вилоят ҳокими Ботир Зариповнинг масъул мутасаддилар, Бухоро шаҳар ҳокими, “Bukhara City” дирекцияси, шунингдек, секторлар раҳбарлари, тегишли ташкилот ва идоралар мутасаддилари ҳамроҳлигида бугун навбатдаги ўрганишлари ҳам ҳудудда бораётган қурилиш–бунёдкорлик ишларини тезлаштириш, бино–иншоотлар тикланишида сунъий тўсқинликни келтириб чиқараётган жиҳатлар ва объектларни бартараф этиш, таъминот ва бошқа масалада қурувчи-бинокорлар дуч келаётган муаммолар ечимига бағишланди.
“Bukhara City” концепциясига мувофиқ, умумий лойиҳа қиймати 550 миллион АҚШ долларини ташкил этаётган ҳудудда 24,9 гектарда 38 та лотдан иборат турар жой (биринчи ва иккинчи қаватларида тижорат объектлари) биноси, 6,6 гектардан иборат 12 та лотда замонавий меҳмонхоналар, 3 гектар майдонда банк ва офис бинолари, 1,7 гектардан иборат 5 та лотда халқ таълими муассасалари, 5,3 гектарда спорт комплекси, тиббиёт клиникаси, ва бошқа турдаги ижтимоий объектлар (музей, илмий марказ, кутубхона, ёшлар маркази) ўрин олмоқда.
Ҳозирда 83 гектар майдонни эгаллаган ва юздан ортиқ тадбиркор сармоядорга тегишли мулк иншоотларида амалга оширилаётган лойиҳаларнинг аҳамияти шундаки, Бухоро шаҳар марказида илк бор 1,1 гектар майдонда 32 қаватли бино, 1,7 гектарда экспо-марказ ҳамда 1,4 гектарда технопарк қурилиши ҳам бошланган. Шунингдек, 26 лотда 1 минг 810 та хонадонга мўлжалланган турар жой (ер майдони 14,1 гектар) биноси, 5,3 гектар ерда 2 мингдан ортиқ иш ўрни яратилиши кутилаётган муҳташам савдо комплекси, ҳар бири 150 ўринга мўлжалланган замонавий меҳмонхоналар, 80 ўринли мактабгача таълим муассасаси ва кафе бинолари учун ер майдонлари ажратилган. Ҳозирда АҚШ, турк, рус, корейс инвесторлари билан бир қаторда йигирмага яқин маҳаллий тадбиркорлик субъекти — инвесторлари ҳудудда ўз лойиҳасини амалга оширмоқда.
Шунингдек, “Bukhara City” дирекцияси маълумотларига биноан, кўчирилган ҳудудларда бўшаган ер майдонларининг 45 та лот (ер майдони 56,2 гектари) жами мавжуд 73 та лотнинг 67,7 фоизи реализация қилинган ва “Каrvon Shopping” билан бирга инвесторларнинг таклифлари маъқулланиб, қурилишга киришилган.
