Сўнгги хабарларга кўра, Ўзбекистон Соғлиқни сақлаш вазирлигига қарашли Дори воситалари сифатини назорат қилиш ва стандартлаштириш лабораторияси томонидан “Док-1 Мах” ҳамда “Амбронол” дори
воситаларининг чуқурлаштирилган сифат назоратини ўтказиш
натижаларига кўра норматив ҳужжатда кўрсатилган таркибга
номувофиқлик аниқланган. Мазкур дори воситаларининг айрим
серияларида пропиленгликоль моддаси ўрнига ёки у билан бирга
этиленгликоль ва диэтиленгликоль моддалари мавжудлиги аниқланди.
Шу муносабат билан вазирлик томонидан барча ҳудудий соғлиқни сақлаш бошқармалари, тиббиёт бирлашмалари ҳузурида оператив штаблар ташкил этилиб, “QURAMAX” МЧЖ орқали чиқарилган дори воситаларидан зарар кўриши эҳтимоли бўлган фуқароларни, хусусан, болаларни аниқлаш ва уларни тиббий кўрикдан ўтказиб, саломатлигини назоратга олиш кўрсатмаси берилди.
Шу билан бирга барча дорихоналарга 2022 йили Ўзбекистон Республикаси худудига “QURAMAX” МЧЖ орқали олиб кирилган барча дори воситаларининг сотилишини тўхтатишга кўрсатма берилди.
Фуқароларга эслатиб ўтамиз: бу тадбирлардан асло ташвиш ва ваҳимага тушишнинг ҳожати йўқ. Юқоридаги дори воситаларининг фақат сўнгги биргина серияси чиқарилишида хатоликка йўл қўйилган бўлиши мумкин. Бироқ олдинги йиллар давомида “QURAMAX” МЧЖ компанияси киритган дори воситалари бошқа мамалакатларда бўлгани каби Ўзбекистонда ҳам беморлар саломатлиги учун ижобий самара берганлиги маълум. Кўрилаётган чоралар Самарқанд вилоятида кузатилган ҳодисанинг бошқа ҳудудларда рўй бермаслигининг олдини олишга қаратилгандир.
Бугун соат 10.00 да Бухоро вилоят Соғлиқни сақлаш бошқармасида ҳам (дам олиш кунида ишлаш қонуний тартибларига мувофиқ) йиғилиш ўтказилиб, белгиланган дори воситаларини дорихоналардан йиғиб олиш ва эҳтимолий зарар кўрган фуқароларни аниқлаш бўйича оператив штаб тузилди. Штабга бошқарма бошлиғи А.С. Баҳронов раҳбарлик қилмоқда.
Штабнинг биринчи йиғилишида барча аъзоларга дорихона ва шифохоналарда кўрилаётган масала бўйича оператив маълумотлар олиш, маълумотлар базасини шакллантириш, тиббий кўриклар ўтказиш ва зарур ҳолатларда тиббий ёрдамни ташкил этиш топшириқлари берилди.
Вилоят Соғлиқни сақлаш бошқармасининг “1064-Ишонч телефони” хизмати ҳам бугундан бошлаб ушбу штаб билан боғлиқ равишда иш олиб боради.
