Ўзбекистон Республикаси Вазирлар Маҳкамасининг 2022 йил 18 январдаги “Истеъдодли ёшларни қўллаб-қувватлаш “Улуғбек жамғармаси фаолиятини ривожлантириш чора-тадбирлари тўғрисида”ги 30-сонли қарори ижросини таъминлаш мақсадида Истеъдодли ёшларни қўллаб-қувватлаш “Улуғбек” жамғармаси, Олий таълим фан ва инновациялар вазирлигининг Бухоро вилоят ҳудудий бошқармаси ҳамда Ромитан тумани ҳокимлиги ҳамкорлигида 16-25 ёшгача бўлган йигит-қизлар ўртасида “Мирзо Улуғбек ворислари” республика танловининг туман босқичи жорий йилнинг 10-13 март кунлари бўлиб ўтди.
Танловнинг Ромитан туман босқичида IQ тестдан жами 125 нафар иштирокчи муваффақиятли ўтган бўлса, шулардан 17 нафари танловда ўз лойиҳаси билан иштирок этди. Якуний баллар натижасига кўра, энг яхши деб топилган 5 нафар иштирокчи танловнинг вилоят босқичига йўлланмани қўлга киритди.
Бугун, 13 март куни Ромитан тумани ҳокимлигининг катта мажлислар залида туман ҳокими Умеджон Барноев, Олий таълим фан ва инновациялар вазирлигининг Бухоро вилоят ҳудудий бошқармаси бошлиғи Азамат Наимов, туман ҳокимининг инновацион ривожланиш масалалари бўйича ўринбосари Талат Шоевлар томонидан танлов ғолибларига сертификатлар ҳамда БҲМнинг 5 баробари миқдоридаги пул мукофотлари топширилди.
Бундан ташқари шу кунни ўзида “Раҳбар ва ёш инноваторлар учрашуви” ҳам бўлиб ўтди. Учрашувда 20 нафардан ортиқ ёш инноваторларнинг инновацион лойиҳа ва ғояларини акс эттирувчи кўргазма ташкил этилди.
Кўргазмада фаол иштирок этган 2 нафар ёш инноваторларнинг лойиҳалари “Энг яхши ишланма” наминацияси бўйича танланиб, сертификат ва эсдалик совғалар билан тақдирланди.
