Бухоро шаҳрининг тарихий юбилей санасини аниқлаш бўйича илмий асосланган қайта ўрганиш ишлари амалга оширилади. Бу ҳақда вилоят ҳокими Ботир Зариповнинг фармойиши эълон қилинди. Ҳужжат 2026 йил 6 май куни қабул қилинган.
Фармойишга кўра, Бухоро давлат университети, Бухоро техника университети, вилоят маданий мерос бошқармаси, Бухоро давлат музей-қўриқхонаси ҳамда тарихчи ва археолог олимлар иштирокида махсус ишчи гуруҳ ташкил этилган.
Таъкидланишича, илмий-археологик тадқиқотлар ва тарихий манбалар таҳлилига кўра, Бухоро шаҳри тарихи амалда қайд этилган 2500 йилдан ҳам қадимроқ даврни ўз ичига олиши мумкин. Шу боис шаҳарнинг аниқ тарихий ёши ва юбилей санасини қайта белгилаш масаласи кун тартибига қўйилган.
Шунингдек, Бухоронинг “уч минг йиллик тарихини” илмий жиҳатдан асослаш ҳамда ЮНЕСКОга тақдим этиладиган номинация ҳужжатларини тайёрлаш вазифаси белгиланган.
Лойиҳа доирасида шаҳарнинг қадимий тарихини ёритувчи ҳужжатли фильмлар тайёрлаш ва йирик маданий тадбирлар ўтказиш ҳам режалаштирилган.
