Жорий йилнинг 15 ноябрь куни ижтимоий тармоқларда Бухоро шаҳрида 4-мактабда ўқитувчи ўқувчиларни калтаклаб дарс ўтаётганлиги ҳақидаги видео тарқалган эди.

Мазкур ҳолатга аниқлик киритиш мақсадида вилоят халқ таълими бошқармаси томонидан махсус ишчи гуруҳи тузилиб, ўрганиш жараёнлари бошлаб юборилгани ҳақида аввалроқ хабар берилган эди.

Ҳозирда ўз педагогик фаолиятини бажаришда қўпол хатоликка йўл қўйганлиги учун мактаб ўқитувчиси ўз аризасига кўра вазифасидан озод этилганлгини маълум қиламиз.

Ушбу ҳолат Бухоро вилоятида фавқулотда вазият сифатида баҳоланиб, шу куннинг ўзида вилоят ҳокими ўринбосари Мирали Ҳамроев раҳбарлигида халқ таълими бўлимлари мудирлари, мактаб директорлари иштирокида ZOOM орқали йиғилиш ўтказилиб, бу ҳолат кенг муҳокама қилинди. Ўқитувчиларнинг педагогик маданиятини ошириш ва бундай хунук ҳолатларнинг олдини олиш борасида қатъий топшириқлар берилди.

Ҳозирда ҳолат бўйича ўрганиш ишлари ҳуқуқ-тартибот идоралари ҳамкорлигида давом этмоқда.

Вилоят халқ таълими бошқармаси Ахборот хизмати