Бугунги кунда Бухоро шаҳрида йўл қурилиши бўйича амалга оширилаётган энг катта лойиҳалардан бири М37 “Самарқанд-Бухоро-Туркманбоши” автомобиль йўлининг 264-километри ёки “Карвон” буюм бозори олдидан ўтувчи ер ости ўтиш йўли ҳисобланади. Мазкур йўл қурилиши тажрибали мутахассис Мурод Бердиев раҳбарлигидаги “Бухоро йўллардан мунтазам фойдаланиш” унитар корхонаси бунёдкорлари томонидан амалга оширилмоқда.
Пиёдалар ер ости ўтиш йўлининг узунлиги 32 метр, кенглиги 4,5 метр, баландлиги 2,5 метрдан иборат.
Қурилишда 250 куб метр бетон, 20 тонна арматура, 1000 метр квадрат гранит ва бошқа қурилиш материаллари ишлатилиши кўзда тутилган.
Йўлнинг бир томонида бозор, бир томонида институт жойлашганлиги, қолаверса, ушбу манзил йўлнинг Бухоро шаҳрига киравериш ҳамда халқаро аҳамиятдаги қисми бўлганлиги боис автомашиналар ва пиёдалар қатнови жуда юқори эканлигини инобатга олинса, ер ости пиёдалар ўтиш йўлагининг қурилишига зарурат борлиги аёнлашади.
Бугун, 2 февраль куни вилоят ҳокими Ботир Зарипов мазкур манзилда бўлиб, қурилиш ишларининг бориши билан танишди. Лойиҳанинг тирбандлик ва ҳаракат хавфсизлигини таъминлашдаги аҳамияти хусусида тўхталиб, ерости йўли қурилишида аввало сифатга эътибор қаратиш лозимлигини таъкидлади. Бу борада масъулларга топшириқ ва тавсиялар берди.
