Вобкент тумани марказидаги маҳалла гузарларида пиёдалар ҳамда велосипедчилар йўлакларини барпо этиш лойиҳаси ишлаб чиқилган. Мазкур саломатлик йўлагини туман марказидаги “Дўстлик”, “Вобкент” ҳамда “Шифокор” МФЙ ларининг Ғафур Ғулом, Дўстлик, Аҳмад Дониш, Тадбиркор ва Зиё кўчаларида умумий 4,5 километр масофада барпо этиш ишлари ўтган ойда бошлаб юборилган.
Бунинг учун бюджет ҳисобидан 3 миллиард 775 миллион сўм маблағ ажратилиб, қурилиш–пудрат корхоналари ўртасида тендер танлови ўтказилган.
Айни кунда мазкур лойиҳа рўёбини “Қоровулбозор оҳактош” МЧЖ қурувчилари ўз зиммасига олган бўлиб, йўлаклар асосини қуриш, бетонлаштириш ишлари сўнгги босқичда давом эттирилмоқда.
Айтиш мумкинки, туман ҳокими Фарҳод Умаров бошчилигидаги ишчи гуруҳи томонидан бу каби янги лойиҳалар амалиёти доимий ўрганилиб, дуч келинаётган муаммолар жойида ҳал қилинмоқда. Аҳолининг барча қатлами спортнинг юриш, югуриш, велоспорт турлари билан шуғуланиши ва саломатлигини мустахкамлашига хизмат қилувчи бу саломатлик йўлакларини мамлакатимиз мустақиллиги куни олдидан фойдаланишга топшириш кўзда тутилган.
