Бухоро туманида маҳалла фуқаролар йиғинлари ходимларининг самарали фаолият юритишлари учун зарур шарт-шароитлар яратиш мақсадида, жойларда янги маҳалла марказлари бинолари қурилиб, фойдаланишга топширилмоқда. Бу албатта, ўз навбатида ўзини-ўзи бошқариш органларига турли масалалар билан мурожаат қилаётган фуқароларга ҳам қатор қулайликлар яратади.
Шу муносабат билан ташкил этилган тадбирда вилоят сектор раҳбарлари, туман ҳокимлиги ва маҳалла фаоллари иштирок этиб, сўнгги йилларда мамлакатимизда Муҳтарам Президентимиз раҳнамолигида маҳалланинг жамиятдаги нуфузини ошириш, ўзини-ўзи бошқариш органлари фаолиятини янада такомиллаштириш, унинг вазифа ва ваколатларини кенгайтиришга алоҳида эътибор қаратилаётганлиги таъкидланди.
Шундан сўнг бино очилиши учун нуроний отахонлар иштирокида рамзий боғич қирқилиб, тадбир иштирокчилари бино ичкарисига таклиф этилди.
Замонавий талаблар асосида бунёд этилган мазкур маҳалла фуқаролар йиғини биносида маънавият ва маърифат, кутубхона, маҳалла раиси, ҳоким ёрдамчиси, ёшлар етакчиси, профилактика инспектори ва хотин-қизлар фаоли учун алоҳида хоналар мавжуд бўлиб, уларнинг ҳар-бири замонавий моддий-техник воситалари ва мебел жиҳозлари билан таъминланган.
Бундан ташқари маҳалла биносида жамоат хавфсизлигини таъминлаш, ҳуқуқбузарликларнинг олдини олиш ва жиноятчиликка қарши курашиш мақсадида Ҳуқуқ тартибот маскани ҳам ўз ишини бошлади. Мазкур масканда ҳудудий профилактика инспектори, шу билан бирга, суриштирувчи, патрул-пост хизмати ва миллий гвардия ходимлари учун алоҳида хоналар ажратилган.
