Бугунги кунда Ромитан туманидаги 244 та фермер хўжалиги томонидан жорий йилда 6414 гектар ерга уруғ қадалган бўлиб, ўртача 26,8 центнер ғалла мажбурияти топширилиши бўйича фермер хўжаликлари билан шартнома имзоланганлиги билан бир қаторда, давлатга қарийб 17 218 тонна ғалла топширилиши кўзда тутилган.
Айни пайтда пишиб етилаётган ғалла ҳосилини юқори унумдор комбайнлар ёрдамида қисқа фурсатларда ўриб-янчиб олиб, қабул масканларига етказиш мақсадида туманнинг барча ҳудудларида сифатли техника ва ишчи кучи жалб этилган ҳолда 22 та махсус отрядлар ташкил этилгани, мавсум давомида туман бўйича 130 дан ортиқ дон териш техникалари жалб қилинган.
Бугун, 5 июнь куни Ромитан тумани “BCT Cluster Agrokompleks” масъулияти чекланган жамиятига қарашли “Нурафшон” ҳудудидаги ғалла майдонида туманда биринчи бўлиб ғалла ўримига старт берилди. Ўрим олдидан жонлиқ сўйилиб, Қуръон ҳатм қилинди.
Ушбу тадбирда вилоят прокурори Улуғбек Хамдамов, туман ҳокими Умеджон Барноев бошчилигида сектор раҳбарлари, туман ҳокими ўринбосарлари, туман қишлоқ хўжалиги вакиллари, ҳудуд раислари, фермер хўжалиги ва кластер масъуллари, ғалла ўримига алоқадор корхона, ташкилот ходимлари, комбайн операторлари, ғалла отряди раҳбарлари иштирок этишди.
Тадбир давомида вилоят прокурори Улуғбек Хамдамов машаққатли меҳнатлар орқали етиштирилган ғаллани нес-нобуд қилмай ва сифатли қилиб йиғиштириб олишда амалга оширилиши лозим бўлган вазифаларни белгилаб берди.
Туманимизнинг нуроний отахонлари она Ватанимиз равнақи, халқимизнинг янада фаровонлиги учун ҳам ғалла ўрими мавсумини беталофот ва баракали бўлишини тилаб дуога қўл очдилар.
Катта хирмонга ҳисса қўшишга бел боғлаган ҳар бир комбайн операторларига 2 миллион сўмдан бўнак пули, 50 килограмм ун, 10 килограмм ўсимлик ёғи ва озиқ-овқат маҳсулотлари берилгани ишга бўлган рағбат ва моддий манфаатдорликни ошириши шубҳасиз.
