Бухоро туманида ногиронлиги бўлган шахсларнинг манфаатларини ҳимоя қилиш, уларни жамиятимизнинг тўлақонли аъзоси эканликларини кўрсатиш мақсадида турли тадбир ва ислоҳотлар амалга оширилмоқда. Жумладан, бугун туман ҳокими Ҳалимжон Сафаровнинг ташаббуси билан «Оқшом» тантаналар саройида Ногиронлар куни муносабати билан байрам тадбир бўлиб ўтди.
Тадбирда 3 декабрь санасида ногиронлиги бўлган шахслар кунининг нишонланишидан асосий мақсад бутун дунёда амалга ошириладиган дастур ва лойиҳаларда ногиронлар бошқа ногирон бўлмаган кишилар билан тенг ҳуқуқлилик асосида иштирок этишини, ногиронларнинг манфаатлари, ҳуқуқлари инобатга олинишини, барча мамлакатларда ногиронларнинг қадр-қимматини ҳимояловчи қонунлар ва тартиб-таомилларнинг жорий этилишини таъминлаб, барча учун очиқ ва дўстона бўлган жамият қуришдан иборат экани айтилди.
- Ногирон сўзи ишлатилганда кўпчиликни кўз олдига моддий ёрдамга муҳтож инсонлар келади. Ҳар ким ҳам имконияти етгунча ногиронларга ёрдам қўлини чўзадилар. Лекин ногиронларга моддий ёрдамдан кўра маънавий ёрдамга эҳтиёж катта. Инсон борки, меҳрга, эътиборга эҳтиёж сезади. Кимнингдир кўнглини кўтариш, ҳолидан хабар олиш асл инсонийликдан, – дейди Ногиронлар жамияти Бухоро туман Кенгаши раиси Ҳамид Ғаниев. – Инсон қадри баланд бўлган юртимиз фаровонлигига кўз тегмасин!
Байрам тадбирида ҳомий ташкилотларининг эсдалик совғалари топширилди ҳамда туман маданият бўлими томонидан ташкил этилган концертда таниқли санъаткорларининг чиқишлари намойиш этилиб, тадбир қатнашчиларининг гулдурос қарсак ва олқишларига сазовор бўлишди.
