БМТ Бош Ассамблеясининг 2007 йил 18 декабрда ўтган йиғилишида қабул қилинган “Қишлоқ ҳудудларида аёлларнинг аҳволини яхшилаш тўғрисида”ги резолюциясига асосан 15 октябрь – Халқаро қишлоқ аёллари куни сифатида расман эълон қилинган бўлиб, бугунги кунда мазкур сана дунёнинг кўплаб давлатлари қаторида мамлакатимизда, хусусан, Ромитан туманида ҳам кенг нишонланиб келинмоқда.
Бугун Ромитан туманида жойлашган “BCT Cluster Agrokompleks” МЧЖ дала шийпонида 15 октябрь – “Халқаро қишлоқ аёллар куни” кенг нишионланди.
Байрам тадбирида туман ҳокими У.Барноев, туман прокурори Ф.Атоев, “BCT Cluster Agrokompleks” МЧЖ раҳбари Р.Норов, Халқ депутатлари туман Кенгаши котибияти мудири Р.Атоева, “Ромитаннома” газетаси муҳаррири М.Атоева, туман ҳокими ўринбосарлари А.Рахматов, З.Аслонова, туман қишлоқ хўжалиги бўлими бошлиғи Бобир Солиев, нуронийлар ва 100 дан ортиқ аёллар иштирок этишди.
Тантанали тадбирда туман ҳокими Умеджон Барноев сўз олиб, туманимизнинг аграр соҳаларида фидойилик намунасини кўрсатиб меҳнат қилаётган аёлларни байрам билан муборакбод этди.
Тадбирда сўз олган туман мутасаддилари томонидан самимий тилаклар билдирилиб, байрам муносабати билан барча аёлларимизга туман ҳокимлигининг ташаккурномаси ва қимматбаҳо совғалари топширилди.
Бир пиёла чой устида ташкил этилган байрам тадбирида туман Маданият бўлими ходимлари томонидан ижро этилган куй-қўшиқлар уларга кўтаринки кайфият бахш этди. Ўз юртини қадрлаб, киндик қони тўкилган ер, заминга эҳтиром билан яшаётган ҳудудини ободонлаштираётган қишлоқ аёлларига ҳурмат кўрсатиш барчамизнинг бурчимиздир.
Фидойилик, ҳалоллик тимсоли бўлган, халқимиз фаровонлиги, дастурхонимиз тўкинлигига катта ҳисса қўшаётган қишлоқ аёлларини ушбу байрам билан чин юракдан қутлаймиз!
