“Менинг нафсим балодир, ҳар мақомга соладир”, деган мақол бежиз айтилмаган. Шайтон васвасасига учиб, ўзгаларнинг ишончини суиистеъмол қилиб, уларни алдаб, мол-молки ва пулларига эга чиқишга уринган кимсалар пайти келиб шармандалик ботқоғига ботишлари тўғрисида ўйлаб ҳам кўрмайдилар.
Судланувчи Душан Жамшидбоев (исм-фамилиялар ўзгартирилган) суд маҳкамасида ўз айбига иқрор бўлди. У жорий йил баҳорида ўзини Абдунаби деб таништирган бир шахс қўнғироқ қилиб, Россия давлатининг Иркутск шаҳрига ишлагани кетмоқчилигини, ўзидан ташқари яна уч нафар шериги борлигини айтиб, шу масалада ёрдам берса, қуруқ қўймаслигини билдирганлигини ва шундай қилиб “хизмат”и ва чипталар учун улардан жами 24 миллион сўмдан ортиқ пул олганлигини тан олди.
Душан жабрланувчиларни осонгина чув туширганидан хурсанд ҳолда пулларни чўнтагига солиб, уларни ўз эҳтиёжига сарфлаб юборди.
-Россияда нуфузли завод бор, ўша ерда ишлайман. Маошим чакки эмас, ўзимга тўқман. Сизларни пайвандчи усталарга ёрдамчи сифатида ишга жойлаштираман,-деб уларга ёлғон ваъдалар берди, ишончига кирди.
” Ҳожатбарор” пулни олиши билан кўздан йўқолди. Қўлга киритилган пулга чипта олишни хаёлигаям келтирмади. Кейинчалик Абдунаби Абдукаримовнинг қўнғироқларига ҳам жавоб бермади.
Узоқ вақт сарсон бўлганларидан сўнг жабрланувчилар алданганликларини тушуниб етдилар. Улар ҳуқуқ-тартибот идораларига шикоят қилишга мажбур бўлишди.
Суд жараёнида фирибгарлик жинояти тўлиқ исботини топди. Судланувчи етказилган моддий зарарни қоплаб берди. Қилмишидан астойдил пушаймонлигини айтиб, унга енгиллик беришларини сўради.
Ўз навбатида суд уни Ўзбекистон Республикаси ЖКнинг 168-моддаси 1-қисмида назарда тутилган жиноятни содир қилганликда айбли деб топди. Унга ЖКнинг 168-моддаси 1-қисми билан ЖКнинг 57-моддаси тартибида базавий ҳисоблаш миқдорининг 20 баравари миқдорида (6.000.000 сўм) жарима жазоси тайинланди. Жазони белгилашда судланувчининг ўз қилмишидан астойдил пушаймонлиги, етказилган зарарни тўлиқ қоплаб берганлиги инобатга олинди.
Бу Душан ва унга ўхшаганларга сабоқ бўлса ажабмас.
Яшин НИЁЗОВ,
Жиноят ишлари буйича
Когон шаҳар суди раиси
