Аёл борки, олам мунаввар, аёл борки, ҳаёт гўзал ва мафтункор. Инсон, оила, аёл тушунчаларини бир-биридан ажралган ҳолда тасаввур этиб бўлмайди. Аёлларни, қизларни баҳорга қиёслашади, баҳорни уларга. Гўзаллик, нафосат, янгиланиш, ҳаёт давомийлиги баҳор ва аёл тушунчаларида уйғунлашиб кетади. “8 март – Халқари хотин-қизлар байрами” эса гўзал ва бетакрор юртимизга баҳор нафаси кириб келганидан дарак беради.
Бугун, 6 март куни Ромитан тумани “Хоса” маҳалла фуқаролар йиғинида жойлашган “Нурафшон” тантаналар саройида яқинлашиб келаётган “8 март – Халқаро хотин-қизлар куни” муносабати билан “Хоса” МФЙдаги бешлик ташаббуси билан бир пиёла чой устида ушбу маҳалладаги 400 нафарга яқин нуроний, кекса онахонлар, хотин-қизлар учун байрам тадбири ташкил этилди.
Тадбирда иштирок этган Маҳалла ва нуронийларни қўллаб-қувватлаш бўлими маслаҳатчиси Олим Жумаев барча кекса онахонлар билан хотин-қизларни байрам билан табриклар экан, жамиятдаги барча аёллар давлатимиз эътибори ва ғамхўрлигида эканлигини таъкидлади.
Тўкин дастурхон атрофида туман Маданият бўлими ходимлари томонидан янграган дил изҳорлари шўх куй-қўшиқларга уланди. Бахтиёр чеҳраларда бу каби эътибор ва меҳрдан миннатдорлик, бугунги дориломон кунларга шукроналик, мамнунлик ҳисси туйилди.
