Ромитан инновацион ҳудудида “Инсон саломатлиги учун муҳим биологик фаол қўшимча ва истеъмол қилинадиган қўзиқорин турларини етиштириш технологиясини тадбиқ этиш” билан шуғулланиб келаётган “GOLD PHARM MUSHROOMS” МЧЖ фаолияти йўлга қўйилди.
Бугун, 28 ноябрь куни Ромитан туман ҳокимининг инновацион ривожланиш масалалари бўйича ўринбосари Талат Шоев яқиндан танишиш мақсадида туманда янги ишга тушган “GOLD PHARM MUSHROOMS” МЧЖ корхонасидаги амалга оширилаётган ишларни кўздан кечирди.
Ушбу лойиҳа Инновацион ривожланиш вазирлиги томонидан молиялаштирилган бўлиб, жами қиймати 930 миллион сўмни ташкил қилади. Ҳозирги кунда ушбу корхонада 12 та иш ўрни яратилган бўлиб, корхонада қўзиқориннинг шампинён, вешенка, рейше, трамефес, герицум турлари етиштирилмоқда.
Бундан ташқари корхона томонидан касаначилик хўжалиги ҳам йўлга қўйилган бўлиб, айни пайтда вешенка ва шампинён турлари етиштирилмоқда.
Ҳозирда қўзиқориннинг янги доривор турини кўпайтириш учун лаборатория ташкил қилиш ишлари амалга оширилмоқда.
