Вобкент туманидаги “Нодиршоҳ” тантаналар мажмуасида “Тиббиёт ходимлари куни” муносабати билан байрам тадбири бўлиб ўтди. Тадбирда туман ҳокимлиги, соғлиқни сақлаш бўлими раҳбар ва ходимлари, соҳада кўп йиллар меҳнат қилган фахрийлар ҳамда энг фаол тиббиёт ходимлари иштирок этди.
Тадбир аввалида Вобкент тумани ҳокими Фарҳод Умаров, барча соғлиқни сақлаш ходимларини касб байрамлари билан қутлаб, уларнинг фидокорона меҳнат фаолиятларига улкан муваффақиятлар тилади. Соҳада амалга оширилаётган ислоҳотлар натижасида, эндиликда тиббий хизматнинг асосий вазифаси касалликларни даволаш эмас, балки уларнинг олдини олишга, аҳолининг саломатлик кўрсаткичларини яхшилашга, узоқ умр кўришига ҳисса қўшишга йўналтирилганлиги билан аҳамиятли экани таъкидланди.
Мамлакатимизда аҳоли ўртасида соғлом турмуш тарзини мустаҳкам қарор топтириш, оналар ва болалар саломатлигини муҳофаза қилиш, ҳар бир фуқаронинг соғлиғини асраб-авайлаш, уларни малакали тиббий хизмат билан тўлиқ қамраб олишга катта эътибор қаратилмоқда ва бу ишларда соғлиқни сақлаш соҳаси ходимларининг меҳнати беқиёсдир. Ўз ҳаётини ана шундай улуғ ва савобли ишга бағишлаб, одамларнинг дардига дармон бўлишни муқаддас бурч деб билган тиббиёт ходимларининг шаънига ҳар қанча таҳсинлар айтсак, арзийди, албатта”, – деди туман ҳокими Фарҳод Умаров.
Бугун кунда фахр билан айтиш лозимки, туманда фаолият юритаётган 20 дан ортиқ тиббиёт ходимлари турли даражадаги орденлар ва кўкрак нишонлари олиш бахтига эришдилар.
Жорий йилда ҳам Ўзбекистон Республикаси Президентининг 2022 йил 12 ноябрдаги “Тиббиёт ходимлари куни муносабати билан соҳа ходимларидан бир гуруҳини мукофотлаш тўғрисида”ги фармони билан Бухоро вилоятидан 3 нафар тиббиёт ходимлари “Меҳнат шуҳрати” ордени билан тақдирландилар.
Тақдирланганлар орасида Вобкент тумандаги “Даврон Бобоқулов” оилавий шифокорлик пункти мудираси Насриева Дилафрўз Савриддиновна ҳам борлиги айниқса тумандошларимиз учун қувонарлидир.
Тадбирда инсон саломатлиги учун масъул, ҳаётимиз мазмунли ва бардавом бўлиши учун жон куйдираётган, ўз саломатлигини ҳам унутиб, бошқаларга ҳаётини бахшида қилаётган, фидойи бир гуруҳ энг фаол тиббиёт ходимларига туман ҳокимининг фахрий ёрлиқ ва қимматбаҳо совғалари топширилди.
Қолаверса ҳозирги кунда туманимизда жами тоифали врачлар сони 117 нафарни ташкил этиб, шундан 72 нафари олий тоифали, 22 нафари 1-тоифали, 23 нафари 2-тоифали тоифали врачлар ҳамда ўрта тоифали тиббиёт ходимлари сони 457 нафарини ташкил қилмоқда.
Тўкин дастурхон атрофида ташкил этилган байрам тадбирида санъаткорлар ва тиббиёт ходимлари томонидан ижро этилган концерт ва саҳна кўринишлари дастури йиғилганларга хуш кайфият улашди.
Келгусида тажрибали тиббиёт ходимлари сони янада кўпаяди ва халқимиз ҳар дуога қўл очганда сўрайдиган соғлик саломатликнинг мустаҳкам қўрғонига айлана олади.
Ajoyib