Бухоро вилоятида истиқомат қилувчи суюлтирилган газ истеъмолчиларининг газ баллонларини ўз вақтида етказиб бериш жараёнида ундан тўғри фойдаланиш ҳамда хавфсизлик қоидаларига риоя этиш мақсадида тушунтириш ишлари олиб борилмоқда. Таъкидлаш лозим, ҳар бир маиший газ баллони етказиб берилишидан аввал синовдан ўтказилади, таъмирланади. Бу билан эса аҳоли хавфсизлиги таъминланади.
«Ҳудудгаз Бухоро» газ таъминоти филиали ҳисобида 184937 дона маиший газ баллони мавжуд бўлиб, истеъмолчиларга вақтинча фойдаланиш учун шартнома асосида тарқатилган.
Аксарият маиший газ баллонларининг навбатдаги синовдан ўтказилиши 2022-2023- йилда режалаштирилган бўлиб, Бухоро туманида жойлашган ва Вобкент газ тўлдириш шохобчаларидаги маиший газ баллонларини таъмирлаш ҳамда синовдан ўтказиш синов цехларида 2022 йилда 36144 таси синовдан ўтказилди.
«Ушбу цехлар жойларда истеъмолчиларнинг маиший газ баллонларидан фойдаланишда хавфсизлигини таъминлаш, уларга ажратилган суюлтирилган газни тўлиқ ҳажмда, ёнғин хавфсизлиги талабларига риоя қилган ҳолда етказиб бериш мақсадида ташкил этилган бўлиб, чилангарлар томонидан амалий ишлар тезкорлик билан, ўз вақтида самарали олиб борилмоқда. Кунига 90-100 дона маиший газ баллонлари синовдан ўтказилиб, муддати муҳрланиб берилмоқда. Вилоят бўйича 2023 йилнинг дастлабки ойидан бошлаб то бугунга қадар жами 4025 та газ баллонлари синовдан ўтказилди», – дейди газ таъминоти филиали бўлим бошлиғи Азиз Расулов.
Маиший газ баллонлари ҳар беш йил давомида синовдан ўтказилиши ҳамда мавжуд муаммо бўлса таъмирланиши лозим. Соҳа вакиллари айнан хавфсизлик масалаларига эътибор берган ҳолда синов цехларида газ баллонларини синовдан ўтказиб, муддатини қайд этиб, хавфсиз етказиб берилишини таъминлашмоқда.
Когон тумани мисолида оладиган бўлсак, ҳудудда 3192 нафар суюлтирилган газ истеъмолчиси истиқомат қилади. Газ таъминоти бўлими ҳисобида эса 3383 дона маиший газ баллони мавжуд бўлиб, «айланма» усулда етказиб берилмоқда. Газ баллонларининг барчаси Бухоро туманидаги синов цехида таъмирланиб, синов муддати қайд этилиб, муҳими, аҳолининг хавфсизлиги таъминланган ҳолда етказиб берилмоқда.
