«Юзон» қишлоғида тиббиёт пункти фойдаланишга топширилди. Бухоро тумани «Боғикалон» маҳалласи 11 та қишлоқдан иборат бўлиб, 530 та хонадондаги 1918 та оилада 7042 нафар аҳоли истиқомат қилади.
Шу кунга қадар Юзон, Қаракўлён ва Панжа қишлоқлари аҳолиси тиббиёт муассасаси мавжуд бўлмаганлиги сабаб, аҳоли бирламчи тиббий хизмат олиш учун узоқ йўл босиб маҳалла марказигача боришга мажбур бўлар эди. Тиббиёт соҳасидаги ислоҳотлар самараси ўлароқ бирламчи тиббий хизмат олиш даражасини аҳолига яқинлаштириш мақсадида Юзон қишлоғида «Маҳалла тиббиёт пункти» ташкил қилинди.
Бу каби янги маҳалла тиббиёт пунктлари иш бошлаши мамлакатимиз мустақиллиги байрами арафасида аҳоли учун қўшалоқ байрамга айланди десак ҳеч ҳам муболаға бўлмайди. Айниқса, чекка қишлоқларга тиббий хизмат кириб бориши одамларнинг оғирини енгил қилиб, инсон қадрини улуғлаш борасидаги саъй-ҳаракатларга хизмат қилади.
