Ямагата университети профессори Тадаши Онодера, Плат Ёнезава корпорацияси техник директори Шинжи Омата, Ямагата университетида Тадбиркорлар ўқув ва тадқиқот маркази координатори Юичи Саитолар Бухоро давлат университетига ташриф буюришди.
Меҳмонларни Бухоро давлат университети Халқаро ҳамкорлик бўйича проректори Аброр Жўраев кутиб олди.
Ташриф аввалида БухДУ залида вилоятдаги барча ОТМлар томонидан ташкил этилган кўргазмани кўздан кечиришди. Шунингдек, Ўзбекистон – Япония маркази Бухоро шаҳар ваколатхонаси фаолияти билан яқиндан танишишди. Халқаро ҳамкорлик бўйича проректори Аброр Жўраев бугунги кунга қадар Япония билан ҳамкорликда қилинган ишлар юзасидан тақдимот қилди. Меҳмонларга БухДУга ташриф чоғидан эсдалик учун совғалар тақдим этилди.
Маълумот ўрнида айтиш жоизки, Япония ҳар жиҳатдан Ўзбекистон учун муҳим ва яқин ҳамкор бўлиб ҳисобланади. Япониядаги Ямагата университети 1949-йилда ташкил топган айни пайтда миллий, кенг қамровли Япония университети саналади. Кўллар, дарёлар, гуруч майдонларини ўз ичига олган табиий гўзалликка эга тоғли минтақада жойлашган муассаса Ямагата префектураси бўйлаб тарқалган тўртта (Кожиракава, Иида, Ёнезава, Тсуруока) кампусга эга. Маҳаллий талабалар қаторида дунёнинг 33 мамлакатидан ёшлар таҳсил олишади. Бакалавриат босқичида 6 та факултетда 12 та кафедра фаолият юритса, магистратура босқичида 6 та мактабда магистрантлар таҳсил олишади.
