Мустақиллигимизнинг 31 йиллиги байрами арафасида кўплаб ҳудудларда янги ва замонавий иншоотлар қад ростлаб, юртимиз кўркига кўрк қўшаётир.
Хусусан, Вобкент туманида ҳам бири-биридан гўзал бинолар фойдаланишга топшириляпти. Шулардан бири — “Чармгарон” маҳалла фуқаролар йиғини биносидир. Мазкур маскан туман аҳолисига чинакам байрам совғаси бўлди.Тантанали равишда бўлиб ўтган очилиш маросимида иштирок этган вилоят ҳокими Б.Зарипов қайд этганидек, Президентимиз томонидан олиб борилаётган оқилона сиёсатнинг асл мақсади мамлакатни эртанги кундаги ривожланишининг муҳим босқичи, аввало, маҳалла институтининг фаолиятини янада такомиллаштириш ва нуфузини янада юксалтиришга қаратилган.
Ёшларни ҳар томонлама баркамол қилиб тарбиялаш, юртимиз тинчлиги ҳамда осойишталигини таъминлаш, халқимиз турмуш фаровонлигини янада ошириш масалалари туман ҳокимлиги мутасаддиларининг доимий эътиборида бўлади- дейди вилоят ҳокими.
Шунингдек тадбирда сўзга чиққанлар сўнгги йилларда юртимизда маҳалла институти фаолиятини ҳар томонлама ривожлантириш, аҳоли мурожаатлари билан ишлашда унинг ўрни ва ролини янада ошириш, бу борада соҳа ходимларига зарур шарт-шароитлар яратиш мақсадида бир қатор ишлар амалга оширилаётганини таъкидлади. Ушбу янги бинода маҳалла ходимларининг самарали фаолият юритишлари учун барча шароитлар яратилганлиги айтиб ўтилди.
Шунингдек бугунги кунда, маҳаллада ишловчиларнинг ҳуқуқ ва ваколатлари кенгайди, масъулияти ошди. Шу билан бирга одамларнинг ҳам маҳаллага муносабати ўзгарди. Аслида ҳам шундай бўлиши керак. Ҳар қандай масалада одамлар аввало маҳаллага боради, қувончу ташвиши маҳалла билан. Бу ерда ечим топмаган масала, муаммо кейин юқорига чиқади. Шунинг учун маҳалла фуқаролар йиғинларида ходимлар ва аҳоли учун ҳам муносиб шароит бўлиши керак.
