2021 йилнинг сентябр ойида, Вобкент туманида фаолият бошлаган “Умид ОИЛ Вобкент парранда” МЧЖ 80 сотиҳ ҳудудни эгаллаган корхона бозорларимиз тўкинлиги, озиқ-овқат маҳсулотлари мўл-кўллигини яхшилаш йўлида, аҳолига сифатли ва тўйимли бройлер жўжаларини етказиб беришни мақсад қилган. Бугун Вобкент туман ҳокими Фарҳод Умаров “Хажувон” маҳалласида жойлашган ушбу корхонанинг фаолияти билан яқиндан танишди.
Айни пайт ушбу замонавий парранда фабрикасида 2 та катта мажмуа ташкил этилган бўлиб, уларда жами 20.500 бошдан 40 кунгача бўлган жўжалар боқилмоқда. Корхона раҳбарининг сўзларига кўра, паррандалар парвариши учун муносиб шароит яратиш учун “Микрокредитбанк”нинг 1 млрд. 500 млн сўм молиявий кўмаги эвазига бройлер жўжалар ва уларнинг озиқ овқат маҳсулотларини олишган.
Ҳозирда жўжаларнинг ҳаво ҳарорати ва намлиги мақбул меъёрда сақланиб, сув ва озуқа билан автоматик таъминланмоқда. Натижада, йилига 100 минг бош экология ва санитария талабларига жавоб берувчи товуқлар боқилмоқда.
Мажмуамизда паррандаларни сақлаш ва озиқлантириш учун ҳам барча шароитлар яратилган. Жумладан, уларнинг рационидаги ем-хашаклар, витамин ва минералларнинг табиий манбалари билан махсус тайёрланган ҳамда биологик ҳимоя қилишнинг ишончли тизими яратилган.
Ҳозирда гўшт маҳсулотларимиз Бухоро вилоятининг барча ҳудудларига етказиб берилмоқда. Ҳудудимизнинг умумий майдони 80 сотих бўлса, биз ҳозир унинг ҳаммасига 2 та парранда мажмуасини қуриб битказганмиз. Келгусида молия муассасаси кредитлари билан уларнинг сонини 4 тага етказиб, маҳсулот тайёрлаш ҳажмини ошириш ниятидамиз, деди “Умид ОИЛ Вобкент парранда” МЧЖ раҳбари Миршод Ўринов.
