Вобкент туманидаги 1-сектор ҳудуди ҳисобланган Хўжарабод маҳалласида бугун туман ҳокими Фарход Умаровнинг маҳалла аҳолиси билан учрашуви бўлиб ўтди.
Учрашувда Вобкент туман Халқ қабулхонаси мудири ва тумандаги бир қатор корхона, ташкилот, муассасалар раҳбарлари ҳам қатнашди.
Учрашув аввалида туман ҳокими мамлакатимиз сиёсий, ижтимоий ва иқтисодий ҳаётида кечаётган кўламли ислоҳотлар, аҳолининг турмуш даражасини юксалтириш, мавжуд камчилик ва муаммоларни бартараф этиш, хусусан туман секторларида қилинаётган ишлар ҳақида тўхталиб ўтди.
Шундан сўнг фуқароларнинг ариза ва шикоятлари тингланди. Жумладан, электр энергияси, моддий ёрдам, йўлларни таъмирлаш, ер олиш каби масалалар кўтарилди.
Бу муаммоларни бартараф этиш юзасидан масъул корхона, ташкилот, муассасалар раҳбарларига тегишли топшириқлар берилди.
Учрашув якунида туманимиз раҳбари мамлакатимизда тадбиркорларга яратилаётган имкониятлар ҳақида сўз юритиб, бу иш билан шуғулланишга доир шунингдек, қишлоқда паррандачилик, тикувчилик, қуёнчилик, иссиқхоналар қуриб иш билан банд бўлиш ва ишсизларнинг ҳам бандлигини таъминлаш юзасидан тавсиялар берди ва келгусида амалга оширилиши лозим бўлган режаларни айтиб ўтди.
Учрашувдан сўнг туман ҳокими мутасадди ташкилотлар раҳбарлари билан биргаликда, мурожаат қилган фуқаро Тоҳир Бобоев хонадонидаги симёғочни кўчага кўчириш бўйича, келишиб олинди.
