Давлатимиз раҳбари томонидан карантин даврида сунъий равишда нарх-наво ўсишининг олдини олиш, барқарорликни таъминлашда нафақат давлат органи вакиллари, балки бутун мамлакат аҳли янада жипслашиб, аҳил ва ҳамжиҳат бўлиб, мураккаб синовларни енгиб ўтиши кераклиги доимий равишда таъкидланмоқда. Шу сабабдан, Миллий гвардия Бухоро вилояти бўйича бошқармаси масъуллари томонидан бириктирилган ҳудудларда нарх-наво кўтарилишини олдини олиш мақсадида мунтазам мониторинг тадбирлари ўтказилмоқда.
Хусусан, масъуллар томонидан ҳар куни белгилаб олинган чора-тадбирлар дастури асосида фаолият амалга оширилиб, озиқ-овқат дўконларининг карантин даврида нархларни сунъий равишда оширмаслиги юзасидан тадбиркорлар билан профилактика ишлари олиб борилмоқда.
Минг афсус бўлсинки, ушбу тадбирлар давомида халқимиз бошига тушган оғир синовлардан ўз нафси йўлида фойдаланиб, даромад орттириб қолишга уринадиган тадбиркорларнинг ҳам мавжудлиги таъбимизни хира қилади, албатта. Ана шундай “ишбилармон” тадбиркорлик субъектларининг фаолиятига чек қўйиш, озиқ-овқат маҳсулотлари нархини ошиб кетишига йўл қўймаслик борасида Миллий гвардия Бухоро вилояти бўйича бошқармаси томонидан ҳамкорликдаги тузилмалар билан биргаликда кескин чоралар кўрилмоқда.
Тадбир давомида, ишчи гуруҳ томонидан харидорларга карантин талабларига қатъий риоя қилиб, оралиқ масофани сақлаган ҳолда савдо қилиш, антисептик воситалари ҳамда тиббий ниқоб билан озиқ-овқат дўконларига кириш кераклиги тушунтириб ўтилмоқда.
