Самарқанд шаҳрида 2025 йил бўлиб ўтиши режалаштирилган ЮНЕСКО Бош конференциясининг 43-сессияси муносабати билан Бухоро давлат давлат университети, Бухоро вилояти ҳокимлиги, Ўзбекистон давлат филармонияси Бухоро вилоят бўлинмаси томонидан Маскат шаҳридаги Ўзбекистон Элчихонаси билан ҳамкорликда Маскат университетида “Бухоро садолари: маданият куни” номли илмий-маданий дастур ўтказилди.
Тақдимот дастурида Ўзбекистоннинг бетакрор маданияти, меъморчилик ёдгорликлари ва улуғ аждодларимизнинг илмий фаолиятига бағишланган видеоролик намойиш этилди ҳамда юртимизнинг миллий ҳунармандчилиги, миниатюра санъати ва бошқа маданий элементлари кўргазмаси ўтказилиб “Бухоро бурчаги” ташкил этилди.
Бундан ташқари, ЮНЕСКО сессияси тарғиботи масалалари, Маскат университети ҳамда Бухоро давлат университети ўртасида талаба ва профессор-ўқитувчилар алмашинувини йўлга қўйиш, илмий соҳа бўйича ҳамкорликни ўрнатиш, туризм ва иқтисодиёт соҳаларида ҳамкорликни ривожлантиришга қаратилган масалалар муҳокама қилинди.
