Ромитан тумани ҳокими Умеджон Барноевнинг турли соҳа ва йўналишларда фаолият юритаётган тадбиркорлик субъектлари вакиллари, янги бизнес лойиҳа ва режалар устида изланаётган ташаббускор тадбиркорлар билан учрашуви туман ҳокимлигининг катта мажлислар залида бўлиб ўтди.
Тадбиркорлар билан ўтказилган суҳбатда сектор раҳбарлари, туман ҳокими ўринбосарлари, тижорат банкларининг вилоят ва туман филиаллари, мутасаддилар, ҳусусан, мазкур масалага бевосита алоқадор ва дахлдор ташкилот-идоралари раҳбарлари, оммавий ахборот воситалари вакиллари ва тадбиркорлар иштирок этди.
Учрашув давомида имтиёзли кредит ажратиш, тадбиркорлик субъектларини кенгайтириш мақсадида қўшимча бино қуриш, бўш турган иншоотни хусусийлаштириш, аҳолига хизмат кўрсатиш учун савдо дўкони қуриш, тикувчилик цехи учун бино олиш, кадастр ҳужжатларини расмийлаштириш, уй-жой қуриш учун кредит олиш ва бошқа масалаларга оид 30 га яқин тадбиркорлар томонидан мурожаатлар келиб тушди.
Тадбиркорлик субъектлари билан очиқ-ошкора мулоқотга киришилган учрашувда 14 та мурожаат шу жойнинг жойнинг ўзида ҳал этилди. Қолган 8 та ижроси муддат талаб этадиган мурожаатлар юзасидан тегишли мутасаддиларга топшириқлар берилиб, туман раҳбари томонидан назоратга олинди.
Тадбиркорларнинг ҳар бир мурожаати мутасадди идоралар вакиллари, бошқарма ва бўлинмалар масъуллари иштирокида таҳлил этилди.
