Ўзбекистон Республикаси Президенти Шавкат Мирзиёевнинг жорий йил 10-11 август кунлари Бухоро вилоятига ташрифи давомида белгилаб берилган вазифаларнинг ижросини туманда самарали ташкил этиш, “Обод ва хавфсиз маҳалла” тамойилидан келиб чиқиб, ҳуқуқбузарлик ва жиноятларни барвақт олдини олиш, бу борада келгусида амалга ошириладиган вазифаларни белгилаш мақсадида Ромитан тумани ҳокими Умеджон Барноев бугун тумандаги мавжуд 45 та маҳалла фуқаролар йиғинларидаги профилактика инспекторлари билан учрашди.
Тадбир очиқ мулоқот тарзда бошланди. Туман раҳбари профилактика инспекторларининг аввало, шахсий ҳаёти, шунингдек, хизмат олиб бораётган ҳудудларидаги муаммо ва таклифларини бирма-бир тинглади. Ҳар бир мурожаатнинг ижроси алоҳида назоратга олинди.
Шу билан бирга профилактика инспекторлари олдида турган энг муҳим вазифаларга тўхталиб ўтилди. Жумладан, аҳолининг осойишталиги, энг аввало, маҳаллада тўғри йўлга қўйилиши зарурлиги таъкидланди. Жиноятчиликни маҳаллаларда жиловлаш масаласига алоҳида аҳамият қаратилиб, бу борадаги фаолият маҳаллалар кесимида танқидий таҳлил этилди.
Туман ҳокими маҳаллаларда жиноятчиликнинг олдини олиш, ажримларни камайтириш, ёшлар тарбиясида маҳалланинг ролини ошириш, маънавий муҳит барқарорлигини таъминлаш, жойларда тадбиркорликни ривожлантириш ва янги иш ўринларини яратиш, шунингдек, экстремизм ва терроризмга, одам савдосига қарши ҳушёрликни ошириш, қонунбузарликларнинг сабаб ва омилларига эътибор қаратилиб, ҳуқуқбузарлик ва жиноятларнинг барвақт олдини олиш, аҳоли мурожаатлари билан ишлашга янгича ёндашиш, профилактика инспекторларининг давлат ва жамоат ташкилотлари билан ҳамкорлигини кучайтириш масалаларига тўхталиб ўтди.
