USD10 268.000.00%
RUB133.04–1.08%

Уйида қиморхона ташкил этган ғиждувонлик фуқарога суд жазо тайинлади

 Уйида қиморхона ташкил этган ғиждувонлик фуқарога суд жазо тайинлади

Ғиждувон туманидаги Жиндакон қишлоғида яшовчи Аъзам Бозоров якка тартибдаги меҳнат фаолияти билан шуғулланади. Қарамоғида уч нафар вояга етмаган фарзанди, кекса онаси, иккинчи гуруҳ ногиронлиги бўлган акаси бор.

Тирикчилиги ўтиб турибди. Аммо бандаси шукр қилиб яшамаса ёмон экан. Аъзамни шайтон йўлдан уздими, ҳартугул пул топишнинг енгилроқ йўлини излаб қолди. Топди ҳам. Уйида қиморхона ташкил қилди.

Қимор деганининг алланимаси бор. Ўйнаган каснинг хумори тутади. Хумори тутганлар қаерга боришади? Аъзамнинг уйига-да дейишингиз тайин. Аммо ҳар қандай қинғир ишнинг ҳам худди хас каби сув бетида қалқиб чиқиши бор. Афсуски, қаҳрамонимиз масаланинг шу томонини ўйламаганди. Қиморхона овозаси қишлоқнинг баланд-паст томлари оша орган ходимлари қулоғига ҳам бориб етди. 3 апрелнинг номозшомида Аъзамнинг Ғолибжон Файзуллаев, Умид Бобоев исм-шарифли фуқароларга уйидан жой ажратиб қимор ва таваккалчиликка асосланган ўйинни ташкил этиб тургани холислар иштирокида аниқланди. 2 қути ўйин картаси ва 320 минг сўм пул тегишли тартибда расмийлаштириб олинди.

Ҳар қандай жиноятнинг жазоси бор. Жиноят ишлари бўйича Ғиждувон туман суди судьяси Б. Ачилов раислигида ўтган суд мажлисида қимор ва таваккалчиликка асосланган ўйинларни ташкил этиш ва ўтказиш жиноятини содир этган Аъзам Бозоровга жазо тайинланди. Бунда унинг оилавий аҳволи, қилмишидан пушаймонлиги ва бошқа омиллар ҳисобга олинди. Пировардида Бозоров Аъзам Рашидович Ўзбекистон Республикаси Жиноят кодекси 278-моддаси 1-қисмида кўрсатилган жиноятни содир қилганликда айбли деб топилди ва унга шу модда билан Жиноят кодексининг 57-моддасини қўллаб, 3 (уч) йил муддатга озодликни чеклаш жазоси тайинланди. Зиммасига қўшимча чекловлар ҳам белгиланди.

Мавзуга оид