2022 йил 29 апрель куни Ўзбекистон Республикаси Спортни ривожлантириш вазири ўринбосари Шахрилло Махмудов Бухоро давлат университетида бўлди. Ш.Махмудов 1992 йилда Бухоро давлат университети Жисмоний маданият факультетини битирган. Вазир ўринбосари ўзи таҳсил олган олийгоҳда жисмоний тарбия ва спорт соҳаси бўйича олиб борилаётган ишлар билан танишиш мақсадида Бухорога келди.
Ташриф давомида БухДУ Жисмоний маданият факультети томонидан “Ҳозирги тараққиёт босқичида жисмоний тарбия ва спорт машғулотларини ташкил қилишнинг истиқболлари: муаммо ва ечимлар” мавзусида халқаро миқиёсидаги илмий анжуманга иштирок этиб “Спорт соҳасида иқтидорли ёшларни саралаб олиш ва мақсадли тайёрлаш тизимини такомиллаштириш масалалари” мавзусида нутқ сўзлади. Вазир ўринбосари Бухоро давлат университетидаги спорт иншоотлари билан яқиндан танишиб чиқди.
Танишув давомида университетдаги боксчилар машғулот олиб борадиган спорт залда бўлиб, бокс бўйича мураббий ва спортчилар билан суҳбатлашди. Суҳбат давомида бокс спорт турини янада ривожлантириш учун тўсиқ бўлаётган муаммолар ва уларни ҳал этиш чоралари тўғрисида фикр алмашишди. Бокс спорт турини ривожлантириш бўйича университетда олиб борилган ишлар ва яратиб берилган шароитлар учун университет раҳбариятига миннатдорчилик билдирди.
Бундан ташқари Шахрилло Махмудов Бухоро давлат университетида спортнинг бошқа турлари бўйича спорт иншоотлари фаолияти ва уларни таъмирлаш давомида олиб борилаётган ишларни ҳам кўздан кечирди. Университетда спортни ривожлантириш учун сузиш спорт тури бўйича “Сув ҳавзаси” қуриш бўйича ишлар режалаштирилди.
Рустам Раҳимбоев,
БухДУ Жисмоний маданият факультети талабаси
