Бугунги кунда Ромитан туманидаги маҳаллаларда маданий тадбирлар ташкил этилиб, аҳолининг муносиб ҳордиқ олиши учун имкониятлар яратилмоқда. Аҳоли ва уюшмаган ёшларнинг бўш вақтларини мазмунли ташкил этиш доирасидаги тадбирлар бу гал 1-секторга қарашли “Самосий” маҳалла фуқаролар йиғинида ўтказилди.
Маҳалла раиси, ҳоким ёрдамчиси, ёшлар бўйича етакчи ва бошқа маҳалла фаоллари, маданият ва санъат усталари томонидан туҳфа этилган байрам дастурида Ромитан тумани ҳокими Умеджон Барноев, туман ҳокими ўринбосарлари Фузулий Саломов, Талат Шоевлар иштирок этди.
Маданий маърифий тадбир доирасида дастлаб ҳудуддаги 26-сонли ўрта умумтаълим мактаби биносида билимдон ёшлар учун заковат интеллектуал ўйини ҳамда спортнинг кураш тури бўйича мусобоқа ташкил этилиб, иқтидор эгалари ўзаро куч синашишди. Мусобақа ғолиблари эсдалик совғалар билан тақдирланди.
Маҳалла аҳли учун ташкил этилган кечки сайлда сўз олганлар юртимизда олиб борилаётган ислоҳотлар натижалари, содир бўлаётган ўзгаришлар ва бунга аҳолининг муносабати, уларнинг кайфияти, аввало, маҳаллада акс этиши, маҳаллада сезилиши ҳақида таъкидлаб ўтди. Шундан сўнг туман Маданият бўлими ходимлари томонидан махсус концерт дастури намойиш этилди. Шўх куй садолар барчани рақсга чорлаб кўтаринки кайфият улашди.
Аҳолининг маданий ҳордиқ олиши учун барча имкониятлар ишга солинди.
