Ўзбекистон Республикаси Президенти томонидан 2023 йил 16 февраль кунида “2023 йилда қайта тикланувчи энергия манбаларини ва энергия тежовчи технологияларни жорий этишни жадаллаштириш чора-тадбирлари тўғрисида” ПҚ-57-сонли Қарори қабул қилинди.
Қарор билан 2023 йилда Ромитан туманида жами 40,8 мегаватт қувватга эга ижтимоий соҳа объектлари, давлат идоралари, тадбиркорлик субъектларининг бино-иншоотлари, аҳоли хонадонлари ва кўп қаватли уйларга қуёш панеллари ва бошқа энергия тежовчи технологияларни жорий этиш белгиланган.
Ушбу вазифалар ижросини таъминлаш мақсадида Ромитан туманида барча ижтимоий соҳа объектлари, ташкилот ва хусусий сектор объектларини муқобил энергия билан таъминлаш ва қуёш панеллари ўрнатиш ишлари бошланган.
Бугун, 30 май куни Ромитан тумани ҳокимлигининг катта мажлислар залида туман ҳокими Умеджон Барноев бошчилигида туман ҳокими ўринбосарлари, тегишли ташкилот, корхона раҳбарлари, барча МФЙ раислари, ҳоким ёрдамчилари ҳамда ёшлар етакчилари иштирокида бугуннинг долзарб масалаларига бағишланган йиғилиш бўлиб ўтди.
Йиғилиш аввалида ҳозирда муқобил энергия ускуналарини ўрнатиш истагида бўлган аҳоли ва тадбиркорлар бу имкониятлардан фойдаланиши, мазкур яшил энергиянинг сифати афзаллик томонлари, ўрнатиш тартиблари, қуёш панели ўрнатиш учун имтиёзли кредитлаш тартиблари ҳақида туман ҳокимининг биринчи ўринбосари Анвар Очилов томонидан йиғилиш иштирокчиларига тушунтириш ишлари олиб борилиб, бу борада ҳар бир масъул раҳбарларга тегишли кўрсатма ва топшириқлар берилди.
Шу билан биргаликда Ўзбекистон Республикаси Президентининг 2023 йил 10 апрелдаги “Ташаббусли бюджетлаштириш амалиётини янада такомиллаштириш ҳамда фаол маҳаллаларни қўллаб-қувватлаш чора-тадбирлари тўғрисида”ги ПҚ-117-сонли қарори билан тасдиқланган ташаббусли бюджетлаштириш жараёнини янада такомиллаштириш бўйича чора-тадбирлар режасига мувофиқ жорий йилнинг 15 июнига қадар ҳудудларда фуқаролар ва жамоат ташкилотларидан ташаббусли бюджет жараёнларини такомиллаштириш бўйича таклифлар йиғиш кўрсатиб ўтилган эди.
Шунга асосан туман камбағалликни қисқартириш ва бандликка кўмаклашиш бўлими ҳамда туман иқтисодиёт ва молия бўлими ҳодимлари томонидан бугуннинг долзарб масалаларига бағишланган йиғилишда маҳалла раислари, ҳоким ёрдамчилари ва фаол фуқаролар томонидан билдирилган ташаббусли бюджет жараёнларини такомиллаштириш бўйича таклифлар мухокама этилди.
