Президентимизнинг маҳаллалар инфратузилмасини янада яхшилашга қаратилган одилона сиёсати натижасида Ромитан туманида ҳам кўплаб маҳаллалардаги коммунал хизматлар билан боғлиқ муаммолар ўз ечимини топиб бормоқда.
Шунга мувофиқ, ҳозирги кунда тумандаги барча кўча ва қишлоқ ҳудудларидаги ички йўлларни таъмирлаш ҳамда шағаллаштириш ишлари жадал суръатларда олиб борилмоқда.
Юк машиналари ёрдамида жами 50 тадан ортиқ қатновда олиб келинган шағаллар, тумандаги “Шўрча” маҳалла фуқаролар йиғинининг “Янги Шўрча”, “Кўҳна Шўрча”, “Работи Сулаймон” ва “Сарикунда” қишлоғларига тўлиқ ётқизилди. Бу каби олиб борилаётган ишларни туман ҳокимлиги вакиллари, туман Халқ қабулхонаси мудири, вилоят ва туман Фавқулотда вазиятлар бўлими масъуллари назорат қилиб бормоқдалар.
Маълумот ўрнида, “Янги Шўрча” қишлоғига 300 метр, “Кўҳна Шўрча” қишлоғига 800 метр, “Работи Сулаймон” қишлоғига 300 метр узунликдаги ички йўлларга шағал ётқизилган бўлса, “Сарикунда” қишлоғида бу кўрсаткич 700 метр узунликгача бориб етди.
Аввалги ўнқир-чўнқир, қишда лой, ёзда чанг кўчалар текис ва равонлашиб, халқимиз кайфиятини кўтармоқда. Бу саъй-ҳаракатлар замирида аҳолини рози қилиш, яшаш шароитларини янада яхшилашдан иборат. Мана шундай ишлардан маҳалла аҳли ўз мамнунлигини изхор қилмоқда.
