Президент Шавкат Мирзиёев тадбиркорлар фаолиятини енгиллаштиришга қаратилган янги таклифларни илгари сурди.
Маълум қилинишича, ҳозирги тартибда корхона номи, фаолият тури ёки бренд акс этган пешлавҳалар айрим ҳолларда реклама сифатида баҳоланиб, қўшимча рухсат ва тўловларни талаб қилмоқда. Бу эса тадбиркорлар учун ортиқча маъмурий юкни юзага келтиряпти.
Давлат раҳбари бинода жойлашган тадбиркорлик субъекти номи ва фаолият тури ҳақидаги маълумотларни реклама сифатида ҳисобламасликни таклиф қилди. Шу билан бирга, бундай пешлавҳалар учун алоҳида “паспорт” расмийлаштириш амалиётини бекор қилиш кўзда тутилмоқда.
Шунингдек, реклама ва ахборот белгиларини жойлаштиришда дизайн талабларини босқичма-босқич жорий этиш, компанияларга тегишли транспорт воситаларида брендларни жойлаштириш тартибини соддалаштириш таклиф қилинди.
Ушбу ташаббуслар тадбиркорлар учун қулайлик яратиш ва ортиқча бюрократик тўсиқларни қисқартиришга қаратилган.
