“ОДИЛ СУДЛОВНИ ТАЪМИНЛАШ – ДАВР ТАЛАБИ!”

2020 йил 30 июнь кунида Ўзбекистон Республикаси Президенти раислигида “Одил судловни таъминлаш ва коррупцияга қарши курашиш борасидаги вазифалар” муҳокамасига бағишланган видеоселектор йиғилиш бўлиб ўтди.

Унда Президентимиз «Суд биносига келган ҳар бир одам адолат борлигига ишониб чиқиб кетиши керак. Бу Президент талаби!» деб таъкидлаб ўтдилар.

Йиғилишда суд тизимини “бир суд – бир инстанция” тамойили асосида қайта кўриб чиқиш топшириғи берилди. Йиғилиш давомида 2018-2019 йилларда биринчи инстанция судларида жами 192 та жиноят иши бўйича 307 нафар шахс оқланган бўлса-да, кўрилган ишларда прокурорлар айбловдан воз кечмаганлиги сабабли прокурорнинг ўз ташаббуси билан айбловдан воз кечадиган тартиб жорий этилиши лозимлиги таъкидланди.

         Олий суд раиси ва Бош прокурорнинг протест келтириш ҳуқуқи бекор қилиниши, назорат тартибида ишларни кўриш амалиётидан воз кечилиб, вилоят судлари апеллация, Олий Суд эса кассация ишларини кўриши таклифи илгари сурилди.

Йиғилиш давомида хусусий мулк ҳақида тўхталиб ўтилиб, хусусий мулк қонун ва суднинг кафолатли ҳимоясида бўлиши таъкидланиб, сўнги бир ярим йил ичида ҳокимларнинг ер ажратиш, бино иншоотларни бузиш ва хусусийлаштиришга оид 1.730 та қарорлари суд орқали бекор қилингани, ерга бўлган ҳуқуқлар кафолати кучайтирилиб, мулкий ҳуқуқларни бекор қилиш фақат суд тартибида ҳал этилишини қатъий белгилаш зарурлиги муҳокама қилинди. Вилоят, туман (шаҳар) ҳокимлари ва барча сектор раҳбарлари ўз ҳудуларида ушбу талабларга қатъий риоя қилишлари шартлиги қайд этилди.

Учрашув давомида суд ишларини видеоконференция тизими орқали кўрилишини 100%га таъминлаш, судлар фаолиятини рақамлаштириш, судда матбуот хизматини ташкил этиш, адвокатура ҳамда тергов институтларини такомиллаштириш масалалари юзасидан фикр ва мулоҳазалар билдирилди.

Давлатимиз раҳбари томонидан одил судловни таъминлаш ва коррупцияга қарши курашиш борасидаги олиб борилаётган ислоҳотлар ҳар бир жисмоний ва юридик шахснинг қонуний ҳуқуқ ва манфаатларини ҳимоя қилишга, халқимизнинг суд тизимига бўлган ишончини оширишга, барчамизни коррупция иллатларига қарши курашишга ундайди.

Фуқаролик ишлари бўйича Когон туманлараро суди раиси Шавкат Зиядуллаев