Барқарор озиқ-овқат занжирларини кенгайтириш, ривожланишга кўмаклашиш ҳамда таълим салоҳиятини ошириш мақсадида Марказий Осиёда трансформатив лойиҳа ўз фаолиятини бошлади. “Марказий Осиё минтақасида озиқ-овқат технологиялари йўналиши бўйича барқарор таълим ва янги мутахассисларни тайёрлаш ҳамда озиқ-овқат технологияси бўйича ўқув дастурларини ишлаб чиқиш (қўшма диплом дастури) мақсадида Марказий Осиёда ўқитувчиларнинг малакасини ошириш” ташаббуси Латвия табиий фанлар ва технологиялар университети бошчилигида амалга оширилади. Лойиҳа Марказий Осиёдаги университетлар, хусусан, Бухоро муҳандислик-технология институти билан яқин ҳамкорликда профессор-ўқитувчиларнинг илмий салоҳиятини оширишга қаратилган.
Ушбу лойиҳа бўйича Латвиянинг Элгава университети масъулларидан ташкил топган делегация вакиллари Бухоро муҳандислик-технология институтида бўлди.
Якуний мақсад озиқ-овқат технологиялари бўйича тадқиқотлар мазмуни ва методологиясини такомиллаштириш, Марказий Осиёда барқарор озиқ-овқат занжирларини ривожлантиришга ҳисса қўшадиган юқори даражадаги мутахассисларнинг янги авлодини тайёрлашдан иборат.
Лойиҳа Германия Иқтисодий ҳамкорлик ва тараққиёт федерал вазирлиги (BMZ) томонидан молиялаштирилади. Германия халқаро ҳамкорлик жамияти (ГИЗ) GmbH томонидан қўллаб-қувватланади.
–2025 йилда якунланадиган Марказий Осиёдаги лойиҳа стратегик жиҳатдан озиқ-овқат технологиялари бўйича таълим ва кадрлар тайёрлашдаги муҳим камчиликларни бартараф этишга қаратилган, –дейди Бухоро муҳандислик-технология институти ректори Садоқат Сиддиқова. –Ўқитувчиларнинг салоҳиятини ривожлантиришга эътибор қаратган ҳолда, лойиҳа ўқитувчиларга илғор билим ва кўникмаларни бериш имкониятини тақдим этиш, бўлажак мутахассисларнинг барқарор озиқ-овқат занжирлари мураккабликларида ҳаракат қилишга тайёр бўлишини таъминлашга қаратилган.
Лойиҳанинг асосий мақсади профессор-ўқитувчиларнинг илмий салоҳиятини оширишдир. Семинарлар, тренинглар ва Марказий Осиёдаги университетлар билан ҳамкорликдаги ташаббуслар ўқитувчиларга озиқ-овқат технологиялари соҳасидаги сўнгги янгиликлардан хабардор бўлиш имконини беради.
Озиқ-овқат технологиясининг динамик хусусиятини ҳисобга олган ҳолда, лойиҳа ўқув дастурини бойитишга қаратилган. Янги мазмун ва методологиялар ёрдамида ўқув дастури сўнгги саноат тенденцияларини акс эттиради ва талабаларни барқарор озиқ-овқат занжирларидаги ҳақиқий муаммоларга тайёрлайди.
Лойиҳанинг асосий янгилиги қўшма диплом дастурини жорий этишдир. Ушбу ташаббус нафақат талабаларнинг илмий тажрибасини бойитибгина қолмай, балки университетлар ўртасидаги ҳамкорликни ривожлантириш, билим ва илғор тажриба алмашишни рағбатлантиришга хизмат қилади.
Марказий Осиё ўзининг хилма-хил маданий ва географик ландшафти билан озиқ-овқат технологиясининг ўзига хос муаммолари ва имкониятларини тақдим этади. Ўқитувчилар ва талабаларнинг касбий малакасини оширишга сармоя киритиб, лойиҳа ижобий ўзгаришлар учун катализатор бўлишни мақсад қилган. Минтақа инновацияларни ривожлантириш, барқарор озиқ-овқат ишлаб чиқаришни рағбатлантириш ва озиқ-овқат таъминоти занжирининг умумий барқарорлигини яхшилашга қодир юқори малакали истеъдодларни жалб қилишдан фойда кўриши мумкин.
–Латвия табиий фанлар ва технологиялар университети томонидан Марказий Осиёдаги университетлар билан ҳамкорликда амалга оширилаётган лойиҳа Марказий Осиёда барқарор ривожланиш йўлидаги муҳим қадамдир, –дейди институт ўқитувчиси Комил Шокиров. –Ўқитувчиларнинг касбий малакасини ошириш ва ўқув дастурларини такомиллаштиришга эътибор қаратиш орқали ушбу ташаббус минтақадаги озиқ-овқат технологиялари соҳасида турли муаммоларни ҳал қилишга қодир малакали мутахассисларни етиштиришга қаратилган. Лойиҳа давом этар экан, у нафақат таълимни ўзгартиришни, балки Марказий Осиё халқига муносиб келажакни шакллантиришдек кенгроқ мақсадни амалга оширишга ҳам ҳисса қўшишни назарда тутади.
