Ижтимоий тармоқларда уч юз миллион сўмдан ортиқ маблағни талон-торож қилган МИБ ходими қўлга олинганлиги тўғрисидаги хабарлар тарқалди.
Айтиш жоизки, Бюро органларида коррупция иллатига қарши курашиш масаласи асосий вазифа ва талаблардан бири бўлиб қолмоқда.
Бу борада, Бюронинг Шахсий хавфсизлик тармоғи ходимлари томонидан хизмат мавқеини суиистеъмол қилиш ва бошқа ножўя хатти-ҳаракатлар содир этиш ҳолатларини олдини олиш ҳамда бунга имкон берувчи шарт-шароитларни бартараф этиш борасида профилактик тадбирлар олиб борилмоқда.
Шунингдек, Бюро ходими деган номга доғ туширган ёки жиноий ҳолатларни содир этган ходимларга нисбатан муросасиз муносабат билдирилмоқда.
Авваламбор шуни таъкидлаш жоизки, ҳолат Бюронинг Шахсий хавфсизлик бўлими томонидан аниқланган.
Жумладан, Бюронинг Когон тумани бўлими депозит бўйича мутахассиси бўлимнинг депозитда сақланаётган жами 339,3 млн. сўм пул маблағларни фуқароларнинг пластик карта рақамларига асоссиз ўтказиб бериб, талон-торож қилганлик ҳолати аниқланиб, ходимга нисбатан чора кўриш учун прокуратура органларига юборилган.
Ҳозирда, собиқ ходимга нисбатан жиноят иши қўзғатилиб, тергов ҳаракатлари олиб борилмоқда.
Коррупцияга қарши кураш жамият ва давлат олдида турган энг муҳим вазифалардан бири экан, унга қарши муросасиз кураш давом этаверади.
Мажбурий ижро бюросининг
Бухоро вилоят бошқармаси
