Сулаймон Жўраев (исм-фамилиялар ўзгартирилган) уч фарзанднинг отаси. Аммо, у Фуқаролик ишлари бўйича Когон туманлараро судининг 2020 йил 9 июндаги суд буйруғини назар-писанд қилмади. Фарзандлари моддий таъминотига эътибор қаратмади. Алимент маблағларини икки ойдан ортиқ муддат мобайнида тўламаганлиги сабабли қарздор жиноят ишлари бўйича Когон туман судининг 2023 йил 19 декабрдаги қарорига асосан, Ўзбекистон Республикаси МЖтКнинг 474-моддаси билан 15 сутка маъмурий қамоқ жазоси қўлланилганидан кейин ҳам ўзига тегишли хулоса чиқармади.
С. Жўраев 24.435.473 сўм алимент қарзини тўламасдан, вояга етмаган фарзандларини моддий таъминлашдан қасддан бўйин товлаб келган.
Суднинг қора курсисига ўтирган судланувчи айбига тўлиқ иқрор бўлди. Пушаймонлигини билдириб, ҳеч қаерда ишламаслиги сабабли алимент тўловларини ўз вақтида тўлай олмаганлиги, бунинг учун маъмурий жавобгарликка ҳам тортилганлиги, алимент қарзини кам-кам тўлаб беришини айтиб, унга қонуний енгиллик беришни сўради.
Томонларнинг мазкур муаммога оид фикрлари ва ҳолатнинг ўзи жиддий ўрганилгач, суд ЖКнинг 122-моддаси 1-қисми билан фарзандлари ризқини ўйламаган отага бир йил озодликдан маҳрум қилиш жазосини тайинлади. Бу эса фарзандни дунёга келтириб қўйиб, унинг таъминотини ўйламаган баъзи “ота”ларга ибрат бўлса, ажаб эмас.
Я. НИЁЗОВ,
Жиноят ишлари бўйича Когон шаҳар судининг раиси
