Бухоро вилоятининг Когон туман ободонлаштириш бошқармаси бошлиғи лавозимида ишлаб келган мансабдор етти йил олдин олган порасини қайтараётган пайтда қўлга олинди. Бу ҳақда «Дарё»га Бош прокуратура ҳузуридаги иқтисодий жиноятларга қарши курашиш департаменти вилоят бошқармаси ахборот хизмати хабар берди.
Таъкидланишича, айни кунда туман ободонлаштириш бошқармаси бошлиғи лавозимида ишлаган Ж.К. Когон туман ҳокимлигининг ташкилий-назорат бўлими бошлиғи лавозимида ишлаган пайтида фуқарога ер олиб бериш ва бунинг учун ҳоким қарорини чиқартириш учун 6 миллион 400 минг сўм пора олган.
Бироқ айтилган ваъда етти йил давомида ҳам бажарилмагач, фуқаро мансабдордан пулни қайтаришини талаб қилган. Ва бу ҳақда ҳуқуқ-тартибот органларига мурожаат қилган.
Фуқаро аризасига кўра, 2020 йилнинг 14 август куни ДХХ ҳамда Иқтисодий жиноятларга қарши курашиш департаменти ходимлари томонидан тезкор тадбир ўтказилган. Мансабдор 6 миллион 400 минг сўм поранинг 5 миллион сўмини ҳайдовчиси орқали фуқаро Т.И.га қайтариб бераётган вақтида ДХХ ва департамент ходимлари томонидан жиноят устида қўлга олинган.
Ҳозирда ушбу ҳолат юзасидан терговга қадар суриштирув ишлари олиб борилмоқда.
