Шаҳримиздаги мавжуд оилавий ётоқхоналар ҳам эндиликда замонавий кўринишга эга бўлади. Бу ҳақда Бухоро шаҳар ҳокими бугун ётоқхоналар ҳолатини ўрганиш чоғида таъкидлади.
Бухоро шаҳар ҳокимлигининг Уй-жойларни ҳисобга олиш ва нотурар жойлардан фойдаланиш давлат корхонаси балансида 10 та оилавий ётоқхона мавжуд бўлиб, ундаги хоналар сони 882 тани ташкил этади. Шу кунларда мазкур оилавий ётоқхоналарда қурилиш, таъмирлаш ишлари жадал суратда давом этмоқда. Хусусан, Иброҳим Мўминов кўчасида жойлашган ижтимоий ётоқхонада таъмирлаш ишлари ниҳояланди. Аҳоли учун барча шароитлар ҳозирланди. Эндиликда бунёдкорлик ишлари Алпомиш, Б.Нақшбанд, Қ.Муртазоев кўчаларида жойлашган оилавий ётоқхоналарда давом этмоқда. Шаҳар ҳокими ўрганишлар жараёнида фуқароларнинг ҳам мурожаатини ўрганди, Уларга керакли шароитларни яратиб бериш юзасидан масъулларга топшириқлар берди.
Мазкур ётоқхоналар ва уларнинг ҳудуди ҳам қисқа фурсатда замонавий қиёфа касб этади. Бу ерда болалар майдончаси, Workout ҳудудлари ташкил этилади. Қисқача айтганда, инсон қадри улуғланаётган бугунги кунда ҳар бир фуқаронинг фаровон ва бахтли яшаши учун барча имкониятлар ишга солинади.
