Бугун Бухоро вилояти 4-сектор раҳбари Д.Юлдашев Когон шаҳри ҳокими Ҳ.Давлатов, “маҳалла еттилиги” ва фаоллари билан бирга ҳудуддаги “Хўжабарги” маҳалласида бўлиб, ҳудуд ободлигини таъминлаш, банд бўлмаган аҳолини муносиб иш ўринларига ишга жойлаштириш, уларни касб-ҳунар ва тадбиркорлик кўникмаларига ўқитиш, ҳақ тўланадиган вақтинчалик ишларга жалб этиш, ҳудудларда тадбиркорликни ривожлантириш юзасидан амалга оширилаётган чора-тадбирлар ижросини ўрганди.
Таъкидлаш лозим бугунги кунда Когон шаҳрининг “Хўжабарги” маҳалласида “Обод маҳалла” дастури доирасида кенг кўламли ободонлаштириш ва бунёдкорлик ишлари олиб борилмоқда.
Сектор раҳбари дастур доирасида қурилиши бошланган мактаб биноси майдонида олиб борилаётган ишлар сифати билан танишиб, ўқитувчилар, ёшлар ва аҳоли учун қулай шароит яратиш бўйича қурилиш ташкилоти масъулларига ўз тавсияларини билдирди.
Худди шундай, бу ерда Д.Юлдашев “Обод қишлоқ” дастури бўйича амалга оширилаётган бошқа лойиҳалар бўйича олиб борилаётган ишлар сифатини ҳам ўрганиб, мазкур жараённи тезлаштириш юзасидан масъулларга тегишли топшириқлар берди.
“Хўжабарги” маҳалласи аҳолиси билан мулоқот давомида кўтарилган ҳар бир масалани ҳал қилиш бўйича масъуллар бириктирилди. Айрим муаммоларни жамоатчилик назоратини кучайтириш орқали ечиш ҳамда ҳашарлар уюштириш масалалари кўриб чиқилди.
Ўрганишлар жараёнида йўл, коммуникация тармоқлари, инфратузилма ҳолатини яхшилаш, электр таъминоти, ичимлик суви билан боғлиқ муаммоларни ҳал этиш, аҳоли саломатлигини асраш мақсадида чуқурлаштирилган тиббий кўриклар ташкил этиш юзасидан масъулларга тегишли топшириқлар берилди.
