Каналимиз орқали Бухоро тумани «Нометан» ва «Кунжиқалъа» МФЙдан электр энергияси таъминоти билан боғлиқ муаммолар юзасидан қилинган мурожаат бўйича қуйидагиларни маълум қиламиз.

Кунлар кескин совий бошлагандан сўнг истеъмолчиларнинг электр энергияси ва газга бўлган талаби ҳам ортиб бормоқда. Шунингдек, совуқ кунларда магистраль газ қувурлари ва тармоқларида табиий газ босимининг ҳам кескин пасайиши кузатилмоқда.

Бунинг натижасида, электр энергиясини ишлаб чиқарувчи айрим иссиқлик электр станцияларига белгиланган ҳажмлардан кам миқдорда табиий газ етиб бормоқда. Бу эса, ўз навбатида электр энергияси ишлаб чиқариш ҳажмининг пасайишига олиб келмоқда.

Шундай ҳолларда, электр энергиясини ишлаб чиқариш объектлари, юқори ва паст кучланишли электр тармоқлари, трансформатор пунктлари ҳамда подстанцияларда юкламаларнинг ортиши натижасида содир бўлиши мумкин бўлган йирик аварияларни олдини олиш мақсадида республикамизнинг айрим ҳудудлари шу жумладан, вилоятимиз электр энергияси таъминотида ҳам чекловлар киритишга мажбур бўлинмоқда.
Фурсатдан фойдаланиб, истеъмолчилардан ушбу вазиятни тўғри тушунишларини сўраган ҳолда, тармоқларда юзага келиши мумкин бўлган йирик аварияларни олдини олиш ҳамда энергия ресурслари барқарорлигини таъминлаш мақсадида, имкон қадар ушбу ресурслардан тежамкорлик билан фойдаланишларини эслатиб ўтамиз.

Шунингдек, Бухоро вилояти ҳокимлиги томонидан оғир ҳудудлар электр энергияси таъминотини яхшилаш мақсадида янги трансформатор пунктлари олиб берилган бўлиб, ҳозирда мутахасислар трансформатор пунктларини созлигини текшириш ишлари олиб борилмоқда.
Жорий йил якунига қадар «Нометан» ва «Кунжиқалъа» МФЙ ҳудудларига 1 донадан қуввати 250 кВА бўлган трансформатор пунктини ўрнатиш ишларининг амалга оширилиши режалаштирилган.

«Бухоро ҲEТК» АЖ матбуот хизмати