Куни кеча Бухоро давлат педагогика институти ректори Баҳодир Маъмуров бошчилигидаги институт жамоаси, вилоят мактабгача ва мактаб таълими бошқармаси бошлиғи Фаррух Қурбонов ҳамда Бухоро давлат университети профессори, тарих фанлари доктори, “Эл-юрт ҳурмати” ордени соҳиби Сулаймон Иноятов бир қатор мактабларда бўлишди.
Хусусан, Бухоро шаҳридаги 11-сон умумий ўрта таълим мактаби жамоаси билан бўлиб ўтган учрашувда сифатли билим беришга асосланган таълим, юқори интеллектуал салоҳиятга эга бўлган мутахассисларни тайёрлаш барча учун энг асосий жиҳат эканлиги алоҳида таъкидланди.
Шунингдек, Бухоро давлат педагогика институти ҳамда мактаб жамоаси билан биргаликда “Яшил макон” умуммиллий лойиҳаси доирасида мактаб боғида кўчатлар ўтқазилди.
Кейинги манзил Шофиркон туманидаги 11-умумий ўрта таълим мактаби бўлди. Ташриф давомида мактабнинг куз-қиш мавсуми учун тайёргалик ҳолати, мактабда яратилган имкониятлар батафсил кўздан кечирилди. Шунинг билан бирга, мактабнинг ахборот-кутубхона маркази учун бир-биридан ажойиб китоблар тўплами совға қилинди.
Ўрганишлар якунида “Яшил макон” умуммилий лойиҳаси кузги мавсуми доирасида мактаб боғига кўчатлар ўтқазилди.
