Ассалому алайкум, ҳаётимиз қувончи, файзу фариштаси бўлган муҳтарама онахонлар! Мунис опа-сингиллар!
Сизларни гўзаллик ва нафосат байрами – Халқаро хотин-қизлар куни билан чин қалбдан қутлаш мен учун улкан шараф ва саодатдир.
Ушбу шукуҳли айёмда ҳаммамиз бизни дунёга келтирган, оқ сут бериб, меҳр ва тарбия бериб вояга етказган буюк она сиймосига, мўътабар аёл зотига таъзим қиламиз. Зеро, инсон қадрини улуғлаш аввало азизу мукаррама аёлларимизни улуғлашдан бошланади.
Давлатимиз раҳбари ҳам “Юртимизда “Аёл бахтли бўлса, жамият бахтли бўлади!”, деган эзгу қараш ҳаётимиз қоидасига айланиши учун барчамиз биргаликда ҳаракат қилишимиз керак”, деган эдилар.
Дарҳақиқат, аёл бор экан, оила деган муқаддас қўрғон, фарзанд деган бебаҳо неъмат бор. Аёлларимиз ўзларини бахтли ҳис қилишар экан, албатта, оиламиз, жамиятимиз ҳам бахтли бўлади.
Донолар айтганидек, дунёда аёл меҳрининг баҳосини ўлчайдиган мезон, тенглаштирадиган бойлик йўқ. Бу аёл деган улуғ хилқатда нозиктаъб, буюк қалб, назокатли кўнгил, бетакрор фидоийлик, она жасорати мужассамлиги натижасидир.
Мана шундай фазилатлар эгаси бўлган ҳар бирингизга байрам муборак бўлсин!
Албатта, оила юмушлари, фарзанд тарбияси билан бирга, турли соҳа ва тармоқларда фидокорона хизмат қилаётган опа-сингилларимизнинг меҳнатини муносиб қадрлаш доимо давлатимиз эътиборида бўлиб келмоқда.
Мазкур қувончли анъана жорий йилда ҳам давом этиб куни кеча Президентимизнинг “8-март – Халқаро хотин-қизлар куни муносабати билан мукофотлаш тўғрисида”ги Фармонларига асосида бухоролик аёллардан 4 нафари давлатимизнинг юксак орден ва медаллари билан тақдирланишди.
Шунингдек, Нилуфар Рухиллаева ҳамда Дилшода Баҳронова сингари зукко қизларимиз Зулфия номидаги давлат мукофотига сазовор бўлишганлигини фахр ва ифтихор билан тилга олиб ўтишни ўринли деб ҳисоблайман.
Ўзбекистон Республикаси Вазирлар Маҳкамаси томонидан “Мўътабар аёл” кўкрак нишонини таъсис этиш тўғрисида қарор қабул қилинган эди.
Мазкур мукофотга бу йил вилоятимиздан 16 нафар хотин-қизлар муносиб кўрилди.
Фурсатдан фойдаланиб, ушбу мукофотга сазовор бўлган мунис аёлларимизни вилоятимиз фаоллари, кенг жамоатчилик ҳамда ўз номимдан муборакбод этаман.
Ҳурматли онахонлар, опа-сингиллар, мунис қизлар!
Барчангизни 8-март – Халқаро хотин-қизлар байрами билан яна бир бор чин дилдан муборакбод этаман. Бамисоли баҳор элчиси бўлиб келаётган, ўзингиздек гўзал ва дилбар мана шу қутлуғ айёмда Cизга узоқ умр, сиҳат саломатлик, бахт ва омад, хонадонингизга файзу барака тилайман.
Фарзандларингиз ва яқинларингиз, элу юртимиз бахтига ҳамиша омон бўлинг!
